Ինչպես հաղորդում են ռուսական լրատվամիջոցները, «Համերաշխություն» ընդդիմադիր շարժման առաջնորդներից Բորիս Նեմցովը ենթարկվել է 15-օրյա կալանքի: Ըստ իրավապահների` նա կալանավորվել է այն բանից հետո, երբ չի ենթարկվել ոստիկանների օրինական պահանջներին: Նեմցովն իր կալանքն անօրինական է համարում: Կալանավորվածների մեջ է նաև ընդդիմադիր առաջնորդներից Էդուարդ Լիմոնովը (նրան կալանավորել են նույն օրը` իր տան մոտ, «մանր խուլիգանության համար»):
Հիշեցնենք, որ «Տրիումֆալնայա» հրապարակում` ի պաշտպանություն Սահմանադրության 31-րդ հոդվածի (հանրահավաքների, երթերի ազատություն), ամեն ամսվա 31-ին, տվյալ դեպքում` դեկտեմբերի 31-ին տեղի են ունեցել բողոքի ակցիաներ: Տարվա վերջին օրը ոստիկանների հետ բախումներից հետո ընդդիմության ակտիվիստները ձերբակալվել են:
Դատավորը որոշումը կայացնելիս հրաժարվել է գործին կցել Նեմցովի կալանավորման տեսանյութը, որտեղ հստակ երևում է, որ ոստիկանության գործողություններն անօրինական են, իսկ Նեմցովը ոչ մի օրենք էլ չի խախտել:
