Ադրբեջանական APA լրատվական գործակալության փոխանցմամբ՝ Ադրբեջանը, Լիտվան և Դանիան հաստատել են մարտի 26-27-ը Սեուլում կայանալիք Միջուկային անվտանգության գագաթնաժողովին իրենց մասնակցությունը: Այս մասին հայտարարել են գագաթնաժողովի կազմակերպիչները:
Վերջիններս համապատասխան հրավերները, որոնք էլ ընդունվել են նրանց կողմից, այդ 3 երկրներին ուղարկել են հունվարին: Դրանով իսկ այդ գագաթնաժողովի մասնակիցների թիվը հասավ 50-ի: Գագաթնաժողովին մասնակցելու է նաև ՄԱԿ-ի գլխավոր քարտուղար Պան Գի Մունը:
Գագաթնաժողովում քննարկվելու են մի շարք առանցքային հարցեր. միջուկային ահաբեկչության վտանգի կանխումը, ահաբեկիչներից ռադիոակտիվ նյութերի պաշտպանությունը, ատոմային էներգիայի գործածման անվտանգության ապահովումը:
Ակնկալվում է, որ գագաթնաժողովում որոշում կընդունվի 3-րդ միջուկային անվտանգության գագաթնաժողովի մասին, որը տեղի կունենա 2014 թվականին Նիդերլանդներում:
Հիշեցնենք, որ առաջին նմանատիպ գագաթնաժողովը տեղի է ունեցել 2010 թվականին ԱՄՆ-ում: Դրան մասնակցել է 47 երկիր: ԱՄՆ նախագահ Բարաք Օբաման դրան մասնակցելու հրավերներ էր ուղարկել Հայաստանի և Վրաստանի նախագահներ Սերժ Սարգսյանին և Միխեիլ Սաակաշվիլիին, իսկ Ադրբեջանի նախագահ Իլհամ Ալիևին՝ ոչ:
