2011 թվականին միջազգային կառույցներում հայաստանյան պատվիրակությունների ակտիվությունն, ըստ ԱԺ ԲՀԿ խմբակցության պատգամավոր Նաիրա Զոհրաբյանի, ամենաառաջնայինը պետք է լինի: «Մենք պիտի շարունակենք մեր ճիշտ նշաձողը պահել ԼՂ բանակցային գործընթացում: Մենք շատ լուրջ հաղթաթուղթ ունենք ի դեմս ՀԱԱԳԱ-ի դատարանի վճռի Կոսովոյի վերաբերյալ, համաձայն որի՝ միակողմանի անկախության հռչակումը չի հակասում միջազգային իրավունքի նորմերին: Սա շատ լրջագույն փաստաթուղթ է հայկական կողմի ձեռքին, և մեր պատվիրակությունները պիտի կարողանան շատ ավելի ակտիվ, շատ ավելի նախաձեռնողական լինել միջազգային կառույցներում»:
Զոհրաբյանը նաև նշեց, որ պետք է շարունակական դարձնել 2010-ին ԱԺ-ի կողմից մշակված այնպիսի ծրագրերը, ինչպիսիք են եվրախորհրդարանի պատգամավորների այցելությունները Հայաստան և ԼՂ. «Նման այցելությունների արդյունքում ռադիկալ փոխվում է նրանց հայացքը Արցախի խնդրի վերաբերյալ և հետագայում շահեկան դիրքերից են ներկայացնում ու պաշտպանում Արցախի հակամարտության իրական պատկերը: Մենք պետք է շարունակենք այս աշխատելաոճը, քանզի ավելի լավ է մեկ անգամ տեսնել, քան հարյուր անգամ միջազգային հարթակից փորձել բացատրել մի բան, որն ինքը չի տեսել: Ի վերջո, մենք պետք է ընդունենք, որ ադրբեջանական քարոզչական լոբբին շատ ակտիվ է աշխատում, և այնտեղ միլիոնավոր դոլարներ են ներդրված, ինչը, ցավոք, մենք չենք կարող իրականացնել»:
Ներքաղաքական առումով, Զոհրաբյանի համար, կարևոր է, որպեսզի 2012-ի ընտրություններին մենք գնանք չունենալով հասարակության մեջ իրար խորթ հայացքով նայող հատվածներ: Տիկին Զոհրաբյանը ցանկանում է, որպեսզի 2011-ին քաղաքական ուժերը միմյանց հանդեպ լինեն շատ ավելի կոռեկտ, զգույշ և ունակություն ունենան լսելու ու հարգելու դիմացինի տեսակետը: