«Սոցիալական և տնտեսական առումով 2011-ին ես ներկայիս վիճակի էլ ավելի վատթարացում եմ կանխատեսում, որովհետև իրավիճակի մի փոքր բարելավում կարելի էր կանխատեսել 2011 թ. բյուջեի ընդունումից հետո, սակայն բյուջեն ներկայացնում է մի փաստաթուղթ, որը ոչ մի խնդիր չի լուծելու: Սա իշխող կոալիցիայի վերջին բյուջեն է, որով նա կարող էր գոնե որոշակիորեն սոցիալական և տնտեսական խնդիրներ լուծել, իսկ հաստատված բյուջեն մեզ թույլ չի տալիս անել ոչ մի դրական կանխատեսում: Սոցիալական լարվածությունը և ճգնաժամը շարունակական են լինելու»,- 2011 թ. վերաբերյալ իր կանխատեսումները փոխանցեց առողջապահության նախկին նախարար Արարատ Մկրտչյանը:
Իսկ այն առումով, որ 2011-ը նաև նախընտրական տարի է Արարատ Մկրտչյանը ասաց, թե 2010 թ. արդեն քաղաքական դաշտը բավականին հետաքրքիր ֆորմատների է ձևավորվել, և հստակեցումներ են եղել. «Այսօր ունենք անորոշության և ոչ կուռ կոալիցիա` իր նկատվող ճաքերով, և ունենք ընդդիմության դաշտում կոնսոլիդացված, թե՛ գաղափարական, թե՛ քաղաքական, թե՛ տնտեսական և սոցիալական առումով հստակ կենտրոնացված ընդդիմություն` ի դեմս Հայ ազգային կոնգրեսի»:
Մկրտչյանի կանխատեսումներով՝ 2011 թ. վերադասավորումներ կարող են տեղի ունենալ կոալիցիայի շրջանակներում, սակայն էական փոփոխություններ չեն լինելու: Կտրուկ փոփոխություններ քաղաքական դաշտում Արարատ Մկրտչյանը չի կանխատեսում: