Երկու զինվորի մահվան մեջ մեղադրվող ջոկի հրամանատար, սերժանտ, 28-ամյա Արմեն Մկրտչյանը մեղմ պատիժ է ակնկալում քրեական և զինվորական գործերով վերաքննիչ դատարանից:
Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը` նախագահությամբ դատավոր Արթուր Մկրտչյանի, 7 տարվա ազատազրկման էր դատապարտել Արմեն Արսենի Մկրտչյանին: Անցյալ տարի, մարտի 8-ի գիշերը` ժամը 03.00-ի սահմաններում, Արմենը իր «ԲՄՎ» մակնիշի ավտոմեքենայով նույն զորամասի պայմանագրային զինծառայողներ` Ռոբերտ Լենդրուշի Մնացականյանի և Լևոն Սարգսի Տերտերյանի հետ ուղևորվել էին Երևան: Արմեն Մկրտչյանը եղել էր թեթև ալկոհոլի ազդեցության տակ: Երբ հասել էին Երևանի Մյասնիկյան պողոտա, Արմեն Մկրտչյանը դուրս էր եկել ճանապարհի երթևեկելի ուղեմասից, ընդհարվել մայթի ծառերին, որի հետևանքով մեքենայի ուղևորներից Լևոն Տերտերյանը մահացել էր տեղում, իսկ Ռոբերտ Մնացականյանը` «Սբ. Գրիգոր Լուսավորիչ» բժշկական կենտրոն տեղափոխելուց հետո: Արմեն Մկրտչյանը ևս հիվանդանոց էր ընդունվել կյանքին վտանգ սպառնացող ծանր մարմնական վնասվածքներով (ըստ դատաբժշկական փորձագետի եզրակացության):
Դիակի դատաբժշկական փորձաքննությամբ պարզվել էր, որ Լևոն Տերտերյանի մահը վրա է հասել տրավմատիկ, հեմոռագիկ շոկից` գլխի, իրանի, վերջույթների` համակցված բաց և փակ, բութ վնասվածքներ ստանալու հետևանքով, որոնք էլ գտնվում են ուղղակի պատճառական կապի մեջ` մահվան անմիջական պատճառի հետ: Դատաքիմիական ուսումնասիրությամբ Լ. Տերտերյանի արյան մեջ ալկոհոլ չի հայտնաբերվել: Ռ. Մնացականյանի մահը ևս վրա է հասել տրավմատիկ, հեմոռագիկ շոկից` համակցված գանգուղեղային, կրծքավանդակի, որովայնի փակ, բութ վնասվածքներ ստանալու հետևանքով, որոնք էլ մահվան պատճառի հետ գտնվում են ուղղակի պատճառական կապի մեջ: Ռոմանը ևս գտնվել է ալկոհոլի միջին հարբածության վիճակում:
Տուժողներից Լևոն Տերտերյանի հարազատները դեպքի մասին իմացել են առավոտյան, իսկ Ռոմանի ընտանիքում գույժը շատ ավելի շուտ են լսել` դեպքից մեկ ժամ անց:
Արմեն Մկրտչյանին մեղադրանք է առաջադրվել ՀՀ քր.օր.-ի 242-րդ հոդվածի 3-րդ մասով` Ճանապարհային երթևեկության և տրանսպորտային միջոցների շահագործման կանոնները խախտելու համար, որն անզգուշությամբ առաջացրել է երկու և ավելի անձանց մահ: Նշյալ հոդվածի սանկցիան նախատեսում է 4-10 տարի ազատազրկում:
Ամբաստանյալը լիովին ընդունել է մեղքը և անկեղծորեն զղջացել է կատարած արարքի համար: Տուժողի իրավահաջորդ Սարգիս Տերտերյանը քաղհայցի պահանջ է ներկայացրել դատարան` ամբաստանյալից դատական պրակտիկայում սահմանված չափով գումար բռնագանձելու վերաբերյալ: Իսկ մյուս տուժողի իրավահաջորդ Կարինե Գասպարյանը Ա. Մկրտչյանից նյութական վնասի հատուցման պահանջ չի ներկայացրել:
Դատարանը պատիժ նշանակելիս հաշվի է առել Արմեն Մկրտչյանի անձը բնութագրող տվյալները, այն, որ նա ընդունել է մեղքը և անկեղծորեն զղջացել է կատարած արարքի համար, խնամքին ունի երկու մանկահասակ երեխա, բնութագրվում է դրական, նախկինում դատված չէ: Որպես պատասխանատվությունն ու պատիժը ծանրացնող հանգամանք` դատարանը հաշվի է առել հանցանքն ալկոհոլի ազդեցության տակ կատարելը: Ի վերջո, դատարանը վճռել է Արմեն Արսենի Մկրտչյանի նկատմամբ պատիժ նշանակել ազատազրկում 7 տարի ժամկետով` զրկելով տրանսպորտային միջոցներ վարելու իրավունքից 2 տարի ժամկետով, Արմեն Մկրտչյանից հօգուտ տուժողի իրավահաջորդ Սարգիս Տերտերյանի բռնագանձել 1.000.000 ՀՀ դրամ` որպես հուղարկավորության ծախսեր:
Դատավճիռը բողոքարկվել ՀՀ վերաքննիչ քրեական դատարան, և պաշտպանական կողմը խնդրել է պատժի մասով բեկանել և փոփոխել դատական ակտը, պատիժը պայմանականորեն չկիրառել` սահմանելով փորձաշրջան կամ նշանակել օրենքով նախատեսվածից ավելի մեղմ պատժաչափ:
