Նյու Յորքի հյուրանոցների սպասուհիները շուտով կսկսեն աշխատանքի գնալ՝ «զինված» հատուկ ազդանշանային սարքերով, որոնց օգնությամբ նրանք կարող են անվտանգության աշխատակիցներին տեղեկացնել իրենց նկատմամբ որևէ ոտնձգության մասին:
Քաղաքային հյուրանոցների աշխատակիցների արհմիությունը նոր աշխատանքային պայմանագրի մեջ այս կետը ներառել է որպես պարտադիր պայման:
Տեղի ԶԼՄ-ների հաղորդմամբ՝ Նյու Յորքի խոշոր հյուրանոցների ղեկավարություններն արդեն համաձայնություն են տվել այդ առաջարկին: «Որքան էլ որ ցավալի է, լինում են դեպքեր, երբ հյուրերն իրենց ոչ պատշաճ ձևով են պահում անձնակազմի նկատմամբ: Այդ սարքերը սպասուհիներին կապահովեն հուսալի պաշտպանությամբ և հնարավորություն կտան նվազեցնել նման դեպքերի թիվը»,- հայտարարել է արհմիության ներկայացուցիչ Ջոն Տարչյանոն:
Այժմ հյուրանոցի սեփականատերերը ստիպված կլինեն մեկ տարվա ընթացքում իրենց աշխատողներին ապահովել սարքերով, որոնք թույլ կտան անհրաժեշտության դեպքում ազդանշան տալ:
Արհմիությունը չի թաքցնում, որ այդպիսի փոփոխություն որոշել են մտցնել Արժույթի միջազգային հիմնադրամի նախկին տնօրեն Դոմինիկ Ստրոս Կանի շուրջ ծավալված աղմկալից սկանդալից հետո: 2011 թ. մայիսին Ստրոս Կանը ձերբակալվեց Նյու Յորքի Sofitel հյուրանոցի սպասուհու նկատմամբ սեռական ոտնձգության մեղադրանքով:
Դրանից հետո Sofitel-ի և մեկ այլ շքեղ հյուրանոցի՝ Pierre-ի ղեկավարությունները հայտարարեցին, որ աշխատակիցների համար պարտադիր կերպով մտցնում են հատուկ ազդանշանային համակարգ: