Հանրապետական կուսակցության մամուլի խոսնակ, ԱԺ պատգամավոր Էդուարդ Շարմազանովը, մեզ հետ զրույցում շնորհավորելով ՀՀ քաղաքացիների Նոր տարին և Սուրբ Ծնունդը, բոլորին մաղթեց առողջություն, երջանկություն, սեր, և որ բոլորի ընտանիքներում հոգևոր արժեքները տիրեն: Այսինքն` մթնոլորտը լինի դրական, և դրա համար պայմաններ լինեն, որպեսզի յուրաքանչյուր ընտանիքի հայր կամ մայր ունենա համապատասխան աշխատանք և աշխատավարձ, որ կարողանա իր երեխաների կարիքները և ցանկությունները հոգալ: Իսկ այն խնդիրները, որոնք եղել են 2010թ-ին, մնան անցյալում: «Ցանկանում եմ, որ բոլորը ժպտան ոչ թե հոլիվուդյան, այսինքն` պարտադրված կամ կեղծ ժպիտով, այլ անկեղծ և առիթավորված: Ճիշտ է` խնդիրները շատ են, բայց հասնենք նրան, որ հոլիվուդյան ժպտը փոխարինենք բնական ժպիտով: Քաղաքական դաշտին կցանկանայի հանդուրժողականություն, համերաշխություն, նախընտրական թեժ պայքար: Իսկ 2011թ լինի ավելի պայծառ տարի: Ամենակարևորը. բոլորին սեր եմ ցանկանում, երջանկություն, բոլորի ընտանքիներում թող երեխաները շատանան: Յուրաքանչյուր ոք իր սրտում մի ցանկություն ունի, որ ոչ ոք չգիտի. ես ցանկանում եմ, որ այդ ցանկությանը մարդիկ իրականության տեսքով ծանոթանան 2011թ-ին»,- ցանկացավ Էդուարդ Շարմազանովը: