Ռուսական ВЗГЛЯД թերթի փոխանցմամբ՝ վրացի ընդդիմադիր միլիարդատեր Բիձինա Իվանիշվիլին այսօր հայտարարել է, որ ԱՄՆ-ը չի ցանկանում Վրաստանում իշխանության ղեկին տեսնել ներկայիս նախագահ Միխեիլ Սաակաշվիլիին.
«ԱՄՆ նախագահ Բարաք Օբաման իր վրացի գործընկեր Միխեիլ Սաակաշվիլիի հետ հանդիպման ժամանակ հայտարարել է, որ Վաշինգտոնը մտադիր չէ հանդուրժել այն, ինչը նա մտադիր է անել: Խոսքը 2013 թվականին վարչապետ դառնալու մասին է: ԱՄՆ-ը շահագրգռված է Վրաստանի կառուցմամբ:
ԱՄՆ-ը ցանկանում է պահպանել այն դրականը, որը ձեռք է բերվել 2003 թվականի «Վարդերի հեղափոխությունից» հետո: Մինչդեռ այն, ինչ այսօր մենք ստացանք, չի հետաքրքրում ո՛չ ԱՄՆ-ին, ո՛չ էլ վրացի ժողովրդին:
Կադրից դուրս Սաակաշվիլիին ասել են, որ ԱՄՆ-ը մտադիր չէ հանդուրժել այն, ինչ նա ցանկանում է անել: Սաակաշվիլին ոչ մի կերպ չպետք է գտնվի իշխանության մեջ»:
Իվանիշվիլիի կոալիցիայի մեջ մտած «Ազատ դեմոկրատներ» կուսակցության նախագահ Իրակլի Ալասանիան իր հերթին հայտարարել է, որ ժողովրդավարական բարեփոխումների ստուգման նպատակով առաջիկա շաբաթներին Վրաստան է այցելելու ԱՄՆ պետքարտուղար Հիլարի Քլինթոնը:
Հիշեցնենք, որ այս տարի Վրաստանում անցկացվելու են խորհրդարանական, իսկ հաջորդ տարի՝ նախագահական ընտրություններ: