Իրանական IRINN հեռուստաալիքի փոխանցմամբ՝ Իրանի նախագահ Մահմուդ Ահմադինեժադը, Թեհրանում ելույթ ունենալով Միասնականության միջազգային կոնֆերանսում, հայտարարել է, որ արևմտյան երկրների ժողովրդավարությունը մեծ կեղծիք է.
«Ամերիկյան վարչակազմի բոլոր որոշումների հետևում կանգնած է Իսրայելը: Այդ ռեժիմները որոշել են ուժի միջոցով գերիշխել աշխարհում:
ԱՄՆ-ը դոլարը ներդրել է՝ որպես համաշխարհային արժութային պաշար, սակայն դա չի տալիս որևէ երաշխիք: ԱՄՆ Դաշնային պահուստային համակարգը թողարկում է արժեթղթեր, բարձրացնում է հաշվեհամարներում առկա զրոները և գողանում է այլոց գումարները:
Երկրագնդի բնակչությունը կազմում է մոտ 7 միլիարդ մարդ: Նրանցից 3 միլիարդը տառապում են սովից, իսկ 1.2 միլիարդը չի կարողանում սնվել նույնիսկ օրական մեկ անգամ: Դաժանությունը, ագրեսիան և կոռուպցիան ամենուրեք են, չկա անվտանգություն և արդարություն:
Աֆրիկան այնպիսի վայր է, որին Աստված մեծ հարստություններ է շնորհել: Սակայն այսօր այնտեղ բնակվող մարդիկ աղքատության մեջ են:
Արևմտյան երկրներում, այդ թվում՝ նաև ԱՄՆ-ում նույնպես գոյություն չունի անկախություն: Նրանք ստեղծում են խորհրդարաններ ու անցկացնում ընտրություններ: Սակայն լավագույն դեպքում այդ ընտրություններին մասնակցում է բնակչության մոտ 50 տոկոսը:
Եվրոպացիները, էլ չասած Իսրայելի մասին, իրենց իդեալները փաթաթում են ոչ միայն մուսուլմանների, այլև՝ ողջ մարդկության վզին»: