Ինչպես երեկ Կիևում հայտարարել է Հիլարի Քլինթոնի` Եվրոպայի և Եվրասիայի հարցերով օգնական Ֆիլիպ Գորդոնը, ԱՄՆ-ը չի ցանկանում, որպեսզի Ուկրաինան գտնվի Ռուսաստանի ազդեցության տակ: Մինչ այդ նա հանդիպումներ է ունեցել երկրի բարձրաստիճան ղեկավարության հետ: Այս մասին հաղորդում է ITAR-TASS գործակալությունը:
«Մենք չենք կարծում, թե Ուկրաինան ցանկանում է կորցնել անկախությունը և լինել ինչ-որ մեկի ազդեցության տակ: Մենք ցանկանում ենք ունենալ ավելի զարգացած հարաբերություններ Ուկրաինայի հետ»,- ասել է պետքարտուղարի օգնականը` հավելելով, որ իրենք կցանկանային, որպեսզի Ուկրաինան ավելի ուղղված լիներ դեպի հյուսիսատլանտյան ինստիտուտներ, ԱՄՆ և Եվրոպական Միություն:
Գորդոնն ասել է նաև, որ իրենք չեն մրցակցում Ռուսաստանի հետ Ուկրաինայի հարցում և չեն ցանկանում, որպեսզի Ուկրաինայի և Ռուսաստանի հարաբերությունները վատթարանան:
«Եթե, օրինակ, Ուկրաինան չկարողանա զարգացնել հարաբերությունները ԵՄ-ի հետ և ավելի մեծ կախվածության մեջ ընկնի Ռուսաստանից, ապա մեզ համար դա ցավալի կլինի, սակայն դա ավելի ցավալի կլինի Ուկրաինայի համար»:
Գորդոնը նշել է, որ ԱՄՆ-ը փորձում է Ուկրաինային առաջարկել բազմազան դարձնել իր հարաբերությունները, տնտեսական և աշխարհաքաղաքական կողմնորոշումները:
«Մենք կարծում ենք, որ Ուկրաինայի ժողովուրդը ցանկանում է, որպեսզի իր երկրում լինեն ազատ և ժողովրդավարական իշխանական ինստիտուտներ, ծաղկող շուկայական տնտեսություն»,- հավելել է պետքարտուղարի օգնականը: