Թուրքական Vatan թերթի փոխանցմամբ՝ Թուրքիայի էներգետիկայի ու բնական պաշարների նախարար Թաներ Յըլդըզն անդրադարձել է թուրք-իրանական գազային պատերազմին: Հիշեցնենք, որ այն բանից հետո, ինչ իրանական կողմը հրաժարվեց նվազեցնել Թուրքիային հատկացվող գազի գինը, Թուրքիան տվյալ հարցով դիմեց Միջազգային միջնորդ դատարան:
Յըլդըզը հայտարարել է. «Թուրքիան հավատում է, որ Միջազգային միջնորդ դատարանն այդ վեճը վճռելու է Անկարայի օգտին: Ներկայումս Թուրքիան ամենաբարձր գնով գազ է գնում հենց Իրանից:
1000 խորանարդ մետր ադրբեջանական գազը Թուրքիայի համար արժենում է 330 դոլար, ռուսական գազը՝ 400 դոլար, իսկ իրանական գազը՝ 550 դոլար (միջազգային շուկաներում 1000 խորանարդ մետր գազի գինը տատանվում է 400-450 դոլարի միջև): Միայն վերջին տարում իրանական գազի մատակարարումների համար Թուրքիան Իրանին վճարել է 800 միլիոն դոլար:
Սակայն Թուրքիան մտադիր է իրանական գազի գինը նվազեցնել մինչև նորմալ միջազգային մակարդակի: Ռուսաստանը նվազեցրել է Թուրքիային վաճառվող իր գազի գինը, որով ստացվեց, որ Թուրքիան վճարել է 2012 թվականին Ռուսաստանից գնել պլանավորած գազի ինքնարժեքի 75 տոկոսը»:
Հիշեցնենք, որ Իրանի նավթարդյունաբերության նախարար Ռոստամ Ղասեմին հայտարարել է, որ Իրանը չի նվազեցնելու Թուրքիային վաճառվող գազի գինը: Ի դեպ, Ադրբեջանն այսօր դադարեցրել է Թուրքիային իր գազի մատակարարումները, ինչի պատճառով Թուրքիան ստիպված է եղել դիմելու Իրանի օգնությանը՝ գազային մատակարարումներն ավելացնելու համար: