Ամանորի և Սուրբ Ծննդյան տոների կապակցությամբ Սերժ Սարգսյանն այսօր ավանդական այցով եղել է մեր երկրի պաշտպանական դիրքերում:
Նախագահականի տարածած մամլո ծառայության տարածած հաղորդագրության համաձայն` Սերժ Սարգսյանը նախ այցելել է Վայոց Ձորի մարզի սահմանամերձ Խաչիկ գյուղ և գյուղի բնակիչներին շնորհավորել գալիք տոների կապակցությամբ, հետաքրքրվել սահմանամերձ բնակավայրի խնդիրներով։
Սերժ Սարգսյանն այնուհետև այցելել է պաշտպանական դիրքեր, զրուցել զինծառայողների հետ, նվերներ հանձնել ծառայության ընթացքում աչքի ընկած զինվորներին: «Սրտանց շնորհավորում եմ Ձեզ Նոր տարվա կապակցությամբ և 2011 թվականին բոլորիդ ցանկանում եմ ուժ, կորով, հավատ, որպեսզի դուք կարողանաք պատվով կատարել այն սուրբ գործը, որ ձեզ է հանձնարարված: Զինվոր լինելը ամենապատվաբեր գործն է: Հայրենիքի սահման պաշտպանող զինվորը մեր աչքի լույսն է և որքան այդ զինվորը տոկուն լինի, հաստատակամ լինի, այնքան մենք լինելու ենք ավելի վստահ և ավելի կազմակերպված»,– զինվորներին ուղղված իր շնորհավորական խոսքում, մասնավորապես, ասել է նա։
Պաշտպանական դիրքեր այցելության ընթացքում Սերժ Սարգսյանին ուղեկցել են Ամենայն Հայոց Կաթողիկոս Գարեգին Երկրորդը, ՀՀ պաշտպանության նախարար Սեյրան Օհանյանը: