Սերժ Սարգսյանը դեկտեմբերի 31–ին հրամանագիր է ստորագրել Գերասիմ Ալավերդյանին գյուղատնտեսության նախարարի պաշտոնից ազատելու մասին: Հանրապետության ղեկավարի մեկ այլ հրամանագրով Սերգո Կարապետյանը նշանակվել է գյուղատնտեսության նախարար: Այս մասին ասված է նախագահականի տարածած հաղորդագրությունում։
Կոալիցիոն համաձայնագրով, գյուղատնտեսության նախարարի պորտֆելը տնօրինում է «Օրինաց երկիր» կուսակցությունը։
Դեկտեմբերի 27–ին «Օրինաց երկիր» կուսակցության առաջնորդ, Հայաստանի Ազգային անվտանգության խորհրդի քարտուղար Արթուր Բաղդասարյանը հայտարարել էր, որ կուսակցության քաղխորհուրդը որոշում է կայացրել գյուղատնտեսության նախարարի պաշտոնից ետ կանչել Գերասիմ Ալավերդյանին՝ հաշվի առնելով գյուղատնտեսության ոլորտում արձանագրված 14.5 տոկոս անկումը։
Սերգո Կարապետյանը նույնպես «Օրինաց երկիր» կուսակցության անդամ է, 62 տարեկան է, ծնունդով Արտաշատից է։ Ավարտել է Հայկական գյուղատնտեսական ինստիտուտի պտղաբանջարաբուծության եւ խաղողագործության ֆակուլտետը` գիտնական- ագրոնոմի մասնագիտությամբ։ Աշխատել է Արտաշատի պահածոների «ՍՈՎԽՈԶ» գործարանում, 1986թ. եղել է Արտաշատի պահածոների «ՍՈՎԽՈԶ» գործարանի գլխավոր տնօրենը։ 1996–ից աշխատել է «Արտաշատի պահածոների գործարան»-ում` «ԱՐՏՖՈՒԴ» ընկերության խորհրդի նախագահ, գլխավոր տնօրեն: Հայաստանի արդյունաբերողների եւ գործարարների միության և Հայաստանի առեւտրաարդյունաբերական պալատի խորհրդի անդամ է, նույն կազմակերպությունների` Արարատի մարզի խորհրդի նախագահ: