Հայաստանի հավաքականի և «Կրասնոդար»-ի հարձակվող Յուրա Մովսիսյանը ռուսական «Սպորտ էքսպրես» կայքին հարցազրույց է տվել.
– Յուրա´, Դուք ծնվել եք Բաքվում, մանկությունն ու պատանեկությունն անցկացրել եք Փասադենայում, իսկ պրոֆեսիոնալ կարիերան շարունակում եք Ռուսաստանում։ Նման կենսագրությամբ ինչպե՞ս կարելի է կատարելապես տիրապետել հայերենին։
– Յուրաքանչյուր հայ ընտանիքում խոսում են իրենց նախնիների լեզվով, և կարևոր չէ, թե որտեղ եք ապրում։ Լեզուն միշտ պահպանվում է։ Թեկուզ այն պատճառով, որ աշխարհում ապրում է 8 միլիոն հայ և նրանցից միայն 3 միլիոնն է ապրում Հայաստանում։
– Անցած ձմռանը Ձեզ հրավիրում էին Կազանի «Ռուբին»-ն ու Կիևի «Դինամո»-ն, իսկ Դուք ընտրեցիք «Կրասնոդար»-ը:
– Դա ճիշտ ընտրություն էր: Ես այստեղ խաղում եմ, գոլեր եմ խփում: Ինձ համար կարևորը խաղալն է: Պահեստայինների նստարանին նստելն ինձ մոտ վատ է ստացվում:
– Այդպիսի բնավորությամբ մեծ ակումբներում Ձեզ համար դժվար կլինի։ Այնտեղ մրցակցությունը մեծ է՝ մեկ տեղին հավակնում են 3 խաղացողներ և բոլորը վարպետներ են։
– Կխաղա նա, ով ավելի ուժեղ է և ավելի լավ է պատրաստված այդ օրվա խաղին: Եթե ես տեսնեմ, որ մրցակիցս ինձնից ուժեղ է, ապա խնդիր չկա: Իսկ եթե մենք կարգով հավասար լինենք, և մարզչի որոշմամբ խաղա միայն մեկը, ապա դա կազդի ցանկացած ֆուտբոլիստի վրա:
– Ճի՞շտ է, որ այս ձմռանը Ձեզ հրավիրել են «ԲԿՄԱ»:
– Այդ մասին ոչինչ չգիտեմ: Ինձ հետ այդ թեման քննարկել են միայն լրագրողները:
– Հավաքների միջև դադարների ժամանակ կա´մ Երևան եք մեկնում, կա´մ Դոնեցկ:
– Երևանում իմ ընկերներն են, այն իմ երկրորդ տունն է: Ինձ այդ քաղաքը շատ է դուր գալիս:
– Եթե հայերը հանդիպեն Անտարկտիդայում, կրկին սեղա՞ն կբացեն, որի վրա կլինի դոլմա, բաստուրմա, թթի կամ հոնի օղի:
– Անպայման: Դուք մոռացել եք բարեհոգության ու հյուրընկալության մասին, իսկ մենք հայեր ենք և բարեսիրտ ենք:
– Արդյո՞ք Հայաստանի հավաքականը Եվրոպայի ամենաարագ զարգացող հավաքականն է:
– Ինձ հաճելի է դա լսել: Մենք նպատակներ ունենք. ցանկանում ենք դուրս գալ Եվրոպայի կամ աշխարհի առաջնության եզրափակիչ փուլ:
– Դա իրատեսակա՞ն է:
– Մենք հավատում ենք մեր ուժերին: Մարզչի գլխավոր հաջողությունն այն է, որ մենք հավատում ենք մեր ուժերին: Վարդան Մինասյանն օգնեց մեզ հասկանալ, որ մենք կարող ենք հաղթել ցանկացած հավաքականի:
