ԱՄՆ-ում Եգիպտոսի պատվիրակությունը չեղյալ է հայտարարել այս շաբաթ նշանակված բոլոր հանդիպումները ամերիկյան օրենսդիրների հետ և լքել ԱՄՆ տարածքը այն բանից հետո, երբ Սպիտակ տունը սպառնացել է Եգիպտոսին չտրամադրել 1.3 մլրդ դոլարի հասնող ֆինանսական օգնությունը,- հաղորդում է Reuters գործակալությունը:
Սպառնալիքները հնչել են Եգիպտոսում գործող ոչ կառավարական կազմակերպությունների դեմ տարվող պայքարի ֆոնին: 2011 թ. դեկտեմբերին Եգիպտոսի ոստիկանությունը խուզարկություն անցկացրեց 17 ոչ կառավարական ժողովրդավարական և իրավապաշտպանաան կազմակերպություններում՝ նրանց գործողությունների իրավաչափությունը ստուգելու համար: Արդյունքում դրանց 6 աշխատակիցների (ԱՄՆ քաղաքացիներ) ժամանակավորապես արգելվեց դուրս գալ Եգիպտոսից:
Հարկ է նշել, որ ԱՄՆ նախագահի վարչակազմն ավարտում է 2013 թ. ֆինանսական տարվա բյուջեի մշակման աշխատանքները, որի հոդվածներից մեկում տեղ կգտնի «արաբական գարնան» հեղափոխությունից հետո Եգիպտոսին օգնություն ցուցաբերելու հարցը: Սակայն Եգիպտոսի զինվորական իշխանությունների կողմից ոչ կառավարական կազմակերպությունների հետապնդումները կարող են հարցականի տակ դնել այդ օգնության հնարավորությունը: