Համաշխարհային բանկը հրապարակել է 2003-2011թթ. Վրաստանում իրականացված բարեփոխումների փորձի շուրջ հետազոտությունը: «Հեղինակների գլխավոր եզրակացությունն այն է, որ չնայած արդյունքների եզակիությանը՝ երկրի նախագահ Միխաիլ Սահակաշվիլիի թիմի «տեխնոլոգիական հայտնագործությունների» գոնե մի մասը կարելի է կիրառել այլ երկրներում»,- «Մեդիամաքսի» փոխանցմամբ՝ գրում է այսօր «Կոմերսանտը»:
2011-ի հունվարի վերջին Համաշխարհային բանկը (ՀԲ) հրապարակել էր «Կոռուպցիայի դեմ պայքարը պետական հատվածում. վրաստանյան բարեփոխումների ժամանակագրություն» խորագրով հետազոտությունը: Վերլուծության էին ենթարկվել Վրաստանի 8` ճանապարհային ոստիկանության, էլեկտրոէներգիայի, հարկային ծառայության, մաքսային, գործարար լիցենզավորման, պետական գրանցման, բարձրագույն կրթության ոլորտներում և քաղաքապետարաններում իրականացված բարեփոխումները:
Հետազոտության հեղինակների առավել հետաքրքրական թեզը Վրաստանում «բարեփոխումների փուլի» առկայությունն է. 2003-2011թթ. բարեփոխումներ իրականացնելու վերաբերյալ քաղաքական որոշումը վերածվեց բավականին լուրջ ռազմավարության, որից բխում էր բավարար գործնական կարգավորման լուծումների շուտափույթ իրականացում: Այս որոշման «արագ» արդյունքները քաղաքական գործիչների համար բացում էին «հնարավորությունների պատուհան» հաջորդ բարեփոխումը ծրագրավորելու ուղղությամբ. նույն կերպ սկսվում էր մյուս ոլորտների նոր փուլի իրականացումը:
Հետազոտության մեջ ասվում էր, որ Վրաստանի իշխանությունները հրաժարվել են «աստիճանական» և «կետային» որոշումներից և արագ արդյունք ստանալու հնարավորության դեպքում պատրաստ են որոշակի «խստության»: Անարդյունավետ և ոչ անհրաժեշտ գերատեսչությունները ոչ թե ենթարկվել են բարեփոխման, այլ ամբողջությամբ վերացվել են (լիցենզավորող կառույցների թիվը Վրաստանում կրճատվել է 40-ից մինչև 20-ը):
ՀԲ-ի հետազոտողներն որպես վրաստանյան բարեփոխումների հաջողության գլխավոր գործոն նշում են բաց տեղեկատվական ռազմավարությունը, ինչպես նաև հակակոռուպցիոն բոլոր գործողությունների հրապարակայնությունը: