«Ժողովուրդ»-ը գրում է, որ շրջանառվող լուրերի համաձայն՝ փետրվարի 9-ին մեկնարկելիք ԵԺԿ համագումարում, բացի ԲՀԿ-ից, հայաստանյան մյուս երեք կուսակցությունները՝ ՀՀԿ-ն, ՕԵԿ-ն ու «ժառանգություն»-ը, դառնալու են ԵԺԿ դիտորդ անդամ:
«ժողովուրդ»-ի աղբյուրների համաձայն՝ ԵԺԿ-ն մերժելու է միայն ԲՀԿ-ին, քանի որ վարչապետ Տիգրան Սարգսյանն անձամբ է աշխատել, որ ԵԺԿ մարսելյան համաժողովում չհնչի ԲՀԿ-ի անունը՝ ԵԺԿ-ին «համոզելով», որ ԲՀԿ առաջնորդը սատարում է Եվրոպայում բռնապետ համարվող Լուկաշենկոյին:
Աժ ԲՀԿ խմբակցության անդամ, Աժ եվրաինտեգրացիայի հարցերով մշտական հանձնաժողովի ղեկավար Նաիրա Զոհրաբյանը չի ցանկացել մեկնաբանել լուրերի հավաստիությունը. «Սակայն, եթե իրապես ԵԺԿ-ի նման լուրջ և հեղինակավոր կուսակցությունն իր որոշումները պետք է կայացնի բամբասանքների և ստահոդ ուղղորդումների հիման վրա, ապա ես ցավում եմ ԵԺԿ-ի համար:
Ինչ վերաբերում է ԲՀԿ նախագահի անունը շահարկելուն, ապա կրկին հիշեցնեմ, որ ԲՀԿ նախագահ Գագիկ Ծառուկյանի և Բելառուսի նախագահի հարաբերություններում քաղաքական մոտիվացիաներ չկան: Եվ, ի դեպ, Հայաստանի քաղաքական իշխանության վերաբերմունքը Բելառուսի և նրա իշխանության հանդեպ ևս բացասական չէ: Իսկ ովքեր լսել են ընդամենը մեկ շաբաթ առաջ ԵԽԽՎ խորհրդարանական վեհաժողովի ամբիոնից հնչեցրած իմ ելույթը Բելառուսում տիրող իրավիճակի մասին, լրջորեն պիտի մտածեն նմա լուրեր շրջանառելուց առաջ: Իսկ մնացածը ԵԺԿ-ի որոշելիքն է»:
