Սփյուռքի նախարարությունն ամփոփում է

Սփյուռքի նախարարության համար 2010 թ. բնութագրվեց որպես հաստատման, վստահության և Սփյուռքի հիմնախնդիրների անդրադարձի տարի:
Սփյուռքի նախարարությունը ծրագրեր է իրականացրել ըստ տարածաշրջանների: Նախարարության գործունեության ընթացքում Սփյուռքի վերաբերմունքը Հայրենիքի նկատմամբ փոփոխվել է:
2010 թ. Սփյուռքի նախարարությունը հռչակել էր «Մայրենիի տարի», որի շրջանակներում իրականացվեց այց Օշական, շարադրության մրցույթ, նկարների մրցույթ, գրողների մեծարման երեկո: Մայրենիի տարին նշվեց ոչ միայն հանրապետության մարզերում, այլ նաև Հունաստանի, Սիրիայի, Լիբանանի, ԱՊՀ պետությունների, Վրաստանի հայ համայնքներում: 2010 թ. «Արի տուն» ծրագրի արդյունքները ամփոփվել և համեմատվել են առաջին տարվա հետ. 2009 թ. 307-ի փոխարեն այս տարվա իրականացված 6 փուլերի արդյունքում Հայաստան են այցելել 560 սփյուռքահայ երիտասարդներ, իսկ մասնակցության երկրների աշխարհագրությունը 14-ից հասել է 26-ի:
Զգալի աշխատանքներ են տարվել նաև հայ համայնքներում կրթամշակութային հիմնախնդիրների լուծմանն աջակցության ծրագրերի մշակման և իրականացման համակարգման ուղղությամբ:
ՀՀ սփյուռքի նախարարությունն ու Համաշխարհային հայկական կոնգրեսը 2010 թ. համատեղ անցկացրին «Լավագույն հայկական կրթօջախ» և «Լավագույն հայկական լրատվամիջոց» մրցույթները: Սփյուռքի նախարարության նախաձեռնությամբ ստեղծվել է ՀՀ բուհերի և միջինմասնագիտական հաստատությունների սփյուռքահայ ուսանողների խորհուրդ: 2010 թ. նոյեմբերի 20-ին ՀՀ կառավարությանն է ներկայացվել «Հայրենադարձության գործընթացի կազմակերպման հայեցակարգի» նախագիծը, որը հավանության է արժանացել դեկտեմբերի 9-ի նիստում: Լրամշակման փուլում է «Հայրենադարձության մասին» ՀՀ օրենքի նախագիծը:
ՀՀ ԳԱԱ ինստիտուտների հետ Մոսկվայում բացվել է «Միջքաղաքակրթական հետազոտությունների կենտրոն», իսկ Եկատերինբուրգի պետական համալսարանում ԵՊՀ-ի սոցիոլոգիայի ամբիոնի հետ ստեղծվել է հայկական հետազոտությունների կենտրոն:
Սփյուռքի նախարարությանը հուզել և հուզում են խառն ամուսնությունները, հայ երիտասարդների սփյուռքահայ համայնքներ, ինչպես նաև սփյուռքահայերի հոսքը Հայաստան:
2011 թ. իրականացվելիք ծրագրերից սփյուռքի նախարարությունը կարևորում է «Հայկական սփյուռք-2011 տարեգրքի» հրատարակումը, «Հայկական սփյուռք վիրտուալ թանգարանի» ստեղծումը, «Հայ բարերարների ճեմուղու» համալրման և բարեկարգման աշխատանքները, Հայագիտական կենտրոնների նոր տեղեկանքների պատրաստումը, Վիեննայի Մխիթարյան միաբանության 200-ամյակի տոնակատարության հետ կապված միջոցառումները: