Newsru.com-ը գրում է, որ ԱՄՆ-ի ռազմածովային ուժերի ավիակիր հարվածող խումբը՝ Enterprise ատոմային ավիակիրի գլխավորությամբ, որը պետք է Պարսից ծոցի շրջան ժամանի մարտին, զորավարժություններ է անցկացնում Ֆլորիդայի արևելյան ափերին` մշակելով Իրանի հետ հնարավոր ռազմական հակամարտության սցենարը: Այս մասին հայտնում է Интерфакс-ը:
Զորավարժությունների ընթացքում օգտագործվում են ԱՄՆ-ի արևելյան ափի քարտեզները, որոնց վրա ամերիկյան նահանգների փոխարեն ուրվագծված են գոյություն չունեցող պետությունները: Մասնավորապես ափից 320 կմ հեռավորության վրա, որն անվանել են «Գանձերի ափ», քարտեզի վրա գծել են նեղուց՝ 54 կմ լայնությամբ։ Նույնչափ լայնություն ունի նաև Հորմուզի նեղուցը, որը Պարսից ծոցը կապում է Արաբական ծովի հետ:
Զորավարժությունների ծրագրով ավիակիրի նպատակը երկու աստվածապետություններ` «Գարնետ» և «Հյուսիսային Գարնետ» են, որոնք երկուսն էլ հիշեցնում են Իրանը: Երկու շահական պետությունները կասկածվում են ահաբեկչությանն օժանդակելու մեջ և ուզում են միավորվել «Պիրոպա» անունով երկրի հետ։ Մեկն այն 10 երկրներից, որոնք գտնվում են «Գանձերի ափին»: Ինչպես հայտնի է, Պարսից ծոցի շրջանում կա ութ երկիր, և Իրանի շուրջ իրադրության մեջ կարևոր դեր է խաղում Իսրայելը:
Հրամանատարության խոսքերով՝ խումբը սովորում է լուծել տարբեր խնդիրներ` մարտին հեռավոր արշավանք սկսելու ժամանակ, այդ թվում նաև պատրաստվում է սուզանավերի և ծովահենների դեմ պայքարի:
ԱՄՆ-ի ռազմածովային ուժերը հավաստում են, որ զորավարժությունների անցկացումն ուղղակիորեն կապված չէ Իրանի շուրջ հնարավոր իրավիճակի զարգացման հետ:
Հարկ է նշել, որ Պարսից ծոցի շրջանում արդեն կենտրոնացված են երկու ավիակիր հարվածող խմբեր` Abraham Lincoln և Carl Vinson ավիակիրների գլխավորությամբ: Իր միակ Charles de Gaulle ավիակիրը Ֆրանսիան մտադիր է ուղարկել այդ շրջան:
Դատելով իրադարձություններից՝ Իրանին հարվածելու ուղղությամբ պատրաստվում են նաև Իսրայելում: Բոլորովին վերջերս Իսրայելի ռազմական հետախուզության ղեկավար Ավիվա Կոխավիnն հայտարարեց, որ Իրանի հոգևոր առաջնորդ Այաթոլլահ Ալի Խամենեին մինչև զենքի մակարդակի ուրանի հարստացման հրաման է տվել: Թեհրանից մեկ տարի կպահանջվի՝ սարքավորման «հումքի» և ևս մեկ-երկու տարի՝ մարտական գլխիկով միջուկային զենքի տեղծման համար, որը կարելի կլինի տեղադրել բալիստիկ հրթիռի վրա: Նրա տվյալներով՝ Իրանն արդեն ստացել է չորս տոննա ուրան` հարստացված մինչև 3.5 % և 100 կգ, և մինչև 20 %: Այս ֆոնի վրա Իսրայելի պաշտպանության նախարար Էխուդ Բարաքը հայտարարել է, որ իրենք ստիպված կլինեն հարվածել Իրանին, եթե Արևմուտքի տնտեսական սանկցիաները Թեհրանի դեմ չտան սպասելիք արդյունքները: Բարաքը, հղում անելով ռազմական փորձագետների կարծիքին, ընդգծել է, որ Իրանին, որն արդեն ունի միջուկային զենք, դիմակայելն ավելի դժվար կլինի, քան հարձակվելը:
Իր հերթին Պենտագոնի ղեկավար Լեոն Պանետան ենթադրել է, որ իսրայելցիները կարող են հարվածել Իրանի միջուկային օբյեկտներին արդեն 2012 թվականի գարնանը:
Իրանցիները ևս անցկացնում են զորավարժություններ
Newsru.com-ը շարունակում է գրել, որ միևնույն ժամանակ Իրանի զինված ուժերը ևս անցկացնում են զորավարժություններ: Այս երկրի ցամաքային զորքերի շտաբում ընգծում են, որ Հորմուզի նեղուցի շրջանում զորավարժություններն անցկացվում են անվտանգության նկատառումներով:
Այնուամենայնիվ, իրանական զորահրամանատարները նախկինի պես շարունակում են հավատարիմ մնալ ռազմատենչ կոչերին:
Ավելի վաղ Իսլամական Հանրապետության իշխանությունները սպառնացել էին փակել Հորմուզի նեղուցը, որը հանդիսանում է արաբական երկրներից նավթի փոխադրման համար հիմնական ջրային տարածքը:
