Ֆիլիպիններում կրկին տեղի է ունեցել երկրաշարժ, որի ուժգնությունը 6.2 մագնիտուդ է,- հայտնում է ԱՄՆ երկրաբանական ծառայությունը: Ինչպես հաղորդում է РБК-ն, երկրաշարժի օջախը գտնվել է 35 կմ խորության վրա, էպիկենտրոնը՝ Դումագուետե քաղաքից 59 կմ հյուսիս-արևմուտք:
Այսօր ավելի վաղ գրանցված՝ 6.8 մագնիտուդ ուժգնությամբ երկրաշարժի հետևանքով զոհվել է 7 մարդ, իսկ`30-ը համարվում են անհայտ կորած: Ինչպես տեղեկացնում է Philippine Daily Inquirеr պարբերականը,զոհվածների թվում կա 2 երեխա:
Երկրաշարժից ամենաշատը տուժել է արևելյան Նեգրոս նահանգը, որտեղ դպրոցներում հետաձգվել են դասերը, իսկ քաղաքացիական ծառայողները դադարացրել են իրենց աշխատանքը:
Այժմ իշխանությունները պատրաստվում են որոնողափրկարարական աշխատանքների:
Սա տարածաշրջանում վերջին օրերի ընթացքում առաջին երկրաշարժը չէ: Փետրվարի 4-ին Ֆիլիպինների կենտրոնական հատվածում ևս երկրաշարժ էր եղել՝ 5.9 բալ ուժգնությամբ, սակայն, բարեբախտաբար, այդ ժամանակ զոհեր չեն գրանցվել: