«Մեծ հաշվով 2010 թվականը նախապատրաստական տարեթիվ էր թե՛ ներքին իրավիճակի տեսանկյունից, թե՛ աշխարհաքաղաքական գործընթացների տեսանկյունից»,- 2010թ . այսպես գնահատեց ԼՂՀ նախկին արտգործնախարար Արման Մելիքյանը:
Ներքին քաղաքական գործընթացները գնահատելով` Մելիքյանը նկատեց, որ Հանրապետական կուսակցության հնաբնակների թևը կկորցնի իր դիրքերը ապագա խորհրդարանում և կփոխարինվի նոր դեմքերով. «Սա կարևոր գործընթաց է և սրանով պայմանավորված կլինի, թե ինչպիսի քաղաքական դիմագիծ կստանա Հայաստանը 2012թ-ին՝ արմատները 2010-ում են: Սա թե՛ ներքին և թե՛ արտաքին պահանջի խնդիր է»:
2010-ի աշխարհաքաղաքական զարգացումների մասին խոսելով, Մելիքյանը նշեց, որ շատ ակտիվ փուլում է նոր աշխարհակարգի ձևավորումը և ավարտին է մոտենում նոր դաշինքների ձևավորման գործընթացը. «Այստեղ կենտրոնական է Ռուսաստանի ճակատագիրը, քանզի որոշում կայացնողները ԱՄՆ և Մեծ Բրիտանիան են, որոնց կամքով թելադրված Ռուսաստանը կամ մուտք կգործի արևմտյան տերությունների ակումբ և համեմատաբար իրավահավասար պայմաններով կհամագործակցի արևմուտքի հետ, կամ կզրկվի մուտքի իրավունքից և ստիպված կլինի ասիական տարածաշրջանում իր գոյությունը պահպանելուն ուղղված շատ լուրջ ճիգեր գործադրել: Այդ որոշումից կբխի նաև Ռուսաստանում ապագա իշխանության ձևավորման հարցը»:
Աշխարհաքաղաքական զարգացումների մեջ Հայաստանի վարած արտաքին քաղաքականության մասին խոսելով, Արման Մելիքյանը կարծիք հայտնեց, որ ներքին փոփոխությունների համատեքստում թե՛ հայ-թուրքական և թե՛ Ղարաբաղյան հարցի շուրջ խնդիրները մղվել են երկրորդ պլան. «Այդ հարցերում փոփոխությունները և դրանց հետագա ճակատագիրը կախված կլինի Ռուսաստանի ապագայից, մասնավորապես կախված նրանից, թե Ռուսաստանը կհարի՞ Արևմուտքին, թե՞ ինքնուրույն կգործի ասիական տարածքում»: