Շնորհավոր Ամանոր
«Դուք մտածում եք. «Ժամանակները վատացել են, ժամանակները ծանրացել են, ժամանակները դժվարացել են»: Ապրեք բարության սկզբունքներով, և դուք կփոխեք ժամանակը»:
Սուրբ Օգոստինոսից բերված այս մեջբերումը այսօր ուզում ենք փոխանցել մեր ընթերցողին, բոլորին, ով ուզում է լսել այս խոսքը Ամանորից և Սուրբ Ծննդից առաջ, բոլորին, ով իրեն պատասխանատու է զգում այս ժամանակների համար և հասկանում է, որ մեզնից յուրաքանչյուրն իր դերն ունի այս ժամանակաշրջանի կերտման մեջ, որ մեզնից յուրաքանչյուրից է կախված՝ կփոխվե՞ն ժամանակները, թե՞ ոչ: Մենք մեր հոգու ողջ ջերմությունը ուզում ենք փոխանցել բոլոր այն մարդկանց, ում համար Նոր տարին ոչ թե տոն է, այլ անհաղթահարելի մի հոգս, անելանելի վիճակ, հուսահատության հանգրվան: Մենք ուզում ենք այդ մարդկանցից ներողություն խնդրել այս ժամանակների համար: Մենք ուզում ենք համբուրել բոլոր այն երեխաներին, ում ցանկությունները կատարելու Ձմեռ պապիկ չի գտնվելու այս տարի. մենք ուզում ենք այդ երեխաներից ներողություն խնդրել այս ժամանակների համար: Մենք ուզում ենք մխիթարել բոլոր այն ծնողներին, ում աչքը ճանապարհին է լինելու` իրենց ղարիբների վերադարձի ճանապարհին. մենք ուզում ենք այդ ծնողներից ներողություն խնդրել այս ժամանակների համար: Մենք ուզում ենք շնորհավորել բոլորին, ովքեր ունեն մեր շնորհավորանքների կարիքը: Մենք ուզում ենք շնորհավորել նաև նրանց, ովքեր մեր շնորհավորանքների կարիքը չունեն: Սիրենք միմյանց և ապավինենք Աստծուն: Շնորհավոր Ամանոր:
