Երեւան քաղաքի Կոմիտասի անվան այգում (Պանթեոն) Դելֆինարիումի կառուցվելու կապակցությամբ «Ժառանգություն» խմբակցությունն այսօր պաշտոնական հարցում է ուղարկել Երեւանի քաղաքապետին, ՀՀ մշակույթի եւ բնապահպանության նախարարներին: «Ժառանգություն» խմբակցությունը Երեւանի քաղաքապետից խնդրել է տրամադրել Դելֆինարիում կառուցելու համար քաղաքապետարանի կողմից տրված թույլտվության համար հիմք հանդիսացած բոլոր փաստաթղթերի պատճեներն ու հիմնավորումները: Ընդդիմադիր խորհրդարանական խմբակցությունը ՀՀ բնապահպանության նախարար Արամ Հարությունյանից խնդրել է հայտնել, թե
1) որն է Կառավարության եւ մասնավորապես` ՀՀ բնապահպանության նախարարության դիրքորոշումը խնդրո առնչությամբ,
2) արդյոք բնապահպանական նկատառումներով թույլատրելի է այդպիսի հաստատության կառուցումը ոչ միայն նման այգում, այլեւ մի գոտում, որը, ըստ էության, սանիտարական է, քանի որ գտնվում է բնակելի տարածքի եւ գերազմանոցի միջեւ:
ՀՀ մշակույթի նախարարին ուղղվել է երեք հարց.
1) ո՞րն է Կառավարության եւ մասնավորապես, ՀՀ մշակույթի նախարարության դիրքորոշումը խնդրի վերաբերյալ,
2) արդյո՞ք հոգեւոր-մշակութային նկատառումներով թույլատրելի է այդպիսի հաստատության կառուցումը նման այգում, որտեղ ամփոփված են հայ ժողովրդի մեծանուն զավակների աճյունները,
3) մի՞թե հայ ժողովուրդն այլեւս նման տաղանդաշատ զավակներ չի ունենալու, իսկ Պանթեոնն էլ ապագայում ընդլայնման կարիք չի ունենալու:
«Ազգային ժողովի կանոնակարգ» ՀՀ օրենքի 7-րդ հոդվածի համաձայն` պետական մարմիններն ու պաշտոնատար անձինք պարտավոր են 10-օրյա ժամկետում գրավոր պատասխանել պատգամավորների գրություններին: