Դեկտեմբերի 10-ին Ամենայն Հայոց կաթողիկոսի կոնդակով Վայոց Ձորի մարզի եկեղեցական համայնքները առաձնացան Սյունյաց թեմի կազմից։ Հայ առաքելական Սուրբ եկեղեցու տերունապատվեր կազմակերպման, հոգևոր սպասավորների ծառայության կանոնակարգման և տարածքային վերատեսչությունը արդյունավետ իրականացնելու համար է արվել փոփոխությունը։ Սյունյաց թեմի Առաջնորդական տեղապահ է նշանակվել Տեր Զավեն Աբեղա Յազիչյանը՝ ազատվելով թեմի Սյունիքի փոխառաջնորդի պաշտոնից։ «Ես խոնարհ եմ, հոգևոր կոչումս թույլ չի տալիս առաջնորդ լինել: Դեռ եպիսկոպոս չեմ»,-ասում է նա: Անցած տարի է նա հոգևոր ծառայության անցել Սյունիքում։ Մեկ տարվա ձեռքբերումներից առաձնացնում է Սյունիքի բոլոր քաղաքային համայնքներում կիրակնօրյա դպրոցների բացումը։ Փոքր-ինչ դժվարություն կար Գորիսում։ Ինչ վերաբերում է Սյունյաց թեմի առաջնորդարանը Գորիսից Կապան տեղափոխելուն, ապա առաջիկայում դա հնարավոր չէ։ Խանութ մտնելիս, ըստ հոգևոր հոր, նայում ենք մեր գրպանին, հետո միայն որոշում, թե ինչ կարող ենք գնել։ Ասել է, թե Կապանի եկեղեցին համապատասխան շինություններ չունի։ «Տարածքի խնդիր կա, կացարաններ պետք է կառուցվի, էնպես չէ, որ միանգամից վեր կենանք ու տեղափոխվենք Կապան»,-ասում է Սյունյաց թեմի տեղապահը: Պարտադիր չէ, թե ովքեր կկառուցեն՝ բարերարնե՞րը, թե՞ տեղական իշխանությունները: Բնականաբար, իր մասնակցությունը կունենա նաև Էջմիածինը: Համապատասխան կառույցների առկայությունից հետո Հայր Զավեն Յազիչյանը խոստանում է բերել Կաթողիկոսի կոնդակը՝ Կապանը որպես Սյունյաց թեմի կենտրոն դարձնելու մասին։ Չէ՞ որ սա իր ծրագրային դրույթներից մեկն է, ու հետո էլ, հեշտ է մարզկենտրոնից կառավարելը։