Արտգործնախարարության պաշտոնական կայքում տեղադրված ամփոփագրում 24 հիմնական իրադարձությունների շարքում, որտեղ թվել է, որ շարունակվել են նպատակաուղղված ջանքերը ԱՊՀ-ի տարածքում հակամարտությունների կարգավորման համար, ամրագրվել է, որ միջազգային բարձր գնահատականի է արժանացել Ռուսաստանի միջնորդական գործունեությունը Լեռնային Ղարաբաղի հակամարտության կարգավորման բանակցություններում, և որ այդ շրջանակներում տեղի են ունեցել Ռուսաստանի, Հայաստանի, Ադրբեջանի նախագահներ Դմիտրի Մեդվեդևի, Սերժ Սարգսյանի, Իլհամ Ալիևի եռակողմ հանդիպումներ` հունվարի 25-ին` Սոչիում, հունիսի 17-ին` Սանկտ Պետերբուրգում, հոկտեմբերի 27-ին` Աստրախանում։
Ինչ վերաբերվում է մյուս հակամարտություններին ապա նշված է, որ որպես Մերձդնեստրի հակամարտության կարգավորման երաշխավոր և 5+2 ձևաչափի բանակցությունների միջնորդ` Ռուսաստանը խթանել է շփումները պաշտոնական Քիշնևի և Տիրասպոլի միջև` հակամարտության շուտափույթ կարգավորման ուղղությամբ։
Վրաստանի հակամարտությունների առնչությամբ ասված է, որ Անդրկովկասում անվտանգության և կայունության հարցերով ժնևյան քննարկումներում Ռուսաստանը հետևողականորեն հանդես է եկել Վրաստանի, Հարավային Օսիայի ու Աբխազիայի միջև ուժի չկիրառմանը իրավական ձևակերպում տալու օգտին։ ՌԴ ԱԳՆ-ն պնդում է, որ հոկտեմբերին ռուսական ուժերը դուրս բերելով Հարավային Օսիայի ու Վրաստանի վիճարկելի տարածքից` Պերևի գյուղի սահմանային դիրքից` վերջնակապես փակվել է Մեդվեդև – Սարկոզի համաձայնությունը Ռուսաստանի կողմից կատարելու խնդիրը։
Ռուսաստանի արտաքին քաղաքականության առաջնահերթությունների թվում նշված է նաև, որ ԱՊՀ-ի տարածքում ինտեգրման զարգացումը մեծ նշանակություն է ունեցել 2010 թվականին ԱՊՀ-ն նախագահող Ռուսաստանի համար։ Որպես ճեղքում է գնահատված ԵվրԱզԷՍ-ի մաքսային միության ստեղծումը՝ Ռուսաստանի, Բելառուսի և Ղազախստանի մասնակցությամբ։ Դեկտեմբերին այս երեք երկրների ղեկավարների մասնակցությամբ ևս մեկ քայլ է արվել միասնական տնտեսական տարածքի ձևավորման ուղղությամբ։ Հաստատվել է Հավաքական անվտագության պայմանագրի անհրաժեշտությունը` որպես առանցքային կառույց հետխորհրդային տարածքում կոլեկտիվ անվտանգության ապահովման գործում։
