ԱՄՆ-ին կոչ են անում կոշտ դիրքորոշում դրսևորել Ադրբեջանի նկատմամբ

«Լրագրողներն առանց սահմանների» միջազգային կազմակերպությունը ԱՄՆ-ի ղեկավարությանը կոչ է արել կոշտ դիրքորոշում դրսևորել Ադրբեջանի նկատմամբ` կապված անհիմն մեղադրանքներով բանտարկության ենթարկված «Գյունդալիք Ազերբայջան» և «Ռեալնի Ազերբայջան» թերթերի գլխավոր խմբագիր Էյնուլա Ֆաթուլլաևի նկատմամբ Մարդու իրավունքների եվրոպական դատարանի` նրան անհապաղ բանտից ազատելու մասին ընդունած վճիռն ադրբեջանական իշխանությունների կողմից չկատարվելու հետ:
Ինչպես տեղեկացրել է ադրբեջանական «Ազադլըգ» թերթը` «Լրագրողներն առանց սահմանների» կազմակերպությունը դատապարտել է Է.Ֆաթուլլաևի` բանտում հերոին պահելու անհիմն մեղադրանքը հանելու և ձերբակալության որոշումը չեղյալ հայտարարելու վերաբերյալ բողոքը չընդունելու մասին Ադրբեջանի գերագույն դատարանի որոշումը:
Կազմակերպության հայտարարության մեջ ասվում է, որ չնայած Մարդու իրավունքների եվրոպական դատարանի և ԵԽ նախարարների կոմիտեի` ադրբեջանցի լրագրողին անհապաղ ազատ արձակելու մասին երկու որոշումներին, Ֆաթուլլաևին դեռ պահում են բանտում: Բացի այդ, ՄԻԵԴ որոշման հակառակ` նրա ընտանիքին փոխհատուցում չի տրվում, իսկ լրագրողի փաստաբան Էլչին Սադըգովի վրա էլ ճնշում է գործադրվում, որպեսզի նա հրաժարվի պաշտպանել Ֆաթուլլաևի իրավունքները` դատարանում: Կազմակերպությունը կոչ է արել Բաքվին վերջ դնել Ադրբեջանում ձերբակալության մեջ գտնվող միակ լրագրողի հետապնդումներին և վերջապես հարգանք դրսևորել իր իսկ ստանձնած միջազգային պարտավորությունների նկատմամբ: