«Հայկական ժամանակ» օրաթերթի լրագրող Հայկ Գևորգյանի կալանքը ազատ խոսքի դեմ ուղղված հերթական քայլն է: «Առաջին լրատվական»-ի հետ զրույցում այս մասին ասաց «168 ժամ» թերթի գլխավոր խմբագրի տեղակալ Գառնիկ Գևորգյանը:
«Այս դեպքը, սակայն, մյուսներից տարբերվում է նրանով, որ ուղղված է ոչ թե լրատվամիջոցի, այլ կոնկրետ լրագրողի դեմ, ընդ որում՝ բոլորի կողմից սիրված, իր ինքնատիպությամբ ու դրական էներգիայով հայտնի անձի դեմ»,- նշեց նա: Գառնիկ Գևորգյանը հույս ունի, որ անկախ նրանից, թե դաշտում են գործում լրագրողները, նրանք միահամուռ կերպով կդատապարտեն Հայկ Գևորգյանի նկատմամբ կատարված ոտնձգությունը:
«Ուզում եմ հավատալ, որ բոլոր լրագրողները կմիավորվեն Հայկին անհապաղ ազատ արձակելու պահանջի շուրջ: Եթե համապատասխան հայտարարություն լինի, ես, անձամբ, պատրաստ եմ ստորագրել դրա տակ»,- ամփոփեց Գառնիկ Գևորգյանը:
Հիշեցնենք, որ ոստիկանության աշխատակիցները Գևորգյանին երեկ առավոտյան՝ ժամը 11-ի սահմաններում նախ բերման են ենթարկել ոստիկանության Կենտրոնի բաժին, այնուհետև նրան կալանավորել են:
«ՀԺ» լրագրողին մեղադրանք է առաջադրվել Քրեական օրենսգրքի 242 հոդվածի 1-ին մասի` «ավտոմեքենա վարող անձի կողմից ճանապարհային երթևեկության և տրանսպորտային միջոցների շահագործման կանոնները խախտելը, որը մարդու առողջությանը անզգուշությամբ պատճառել է ծանր կամ միջին ծանրության վնաս», և 244 հոդվածի` «ճանապարհատրանսպորտային պատահարի վայրը թողնելը», հատկանիշներով: