Մեղադրողը փետրվարի 3-ի դատական նիստում պահանջել է 9 տարվա ազատազրկման դատապարտել Համլետ Դավթյանի թիկնապահ Արման Մելիքյանին: Վերջինս մեղադրվում է Կարատեի Ջիու-ջիցու մարզաձևի ֆեդերացիայի նախկին նախագահ, սև գոտի Համլետ Դավթյանի հավաքագրած և Կիևյան փողոցում աշխատող աղջիկների սեռական շահագործմանն օժանադակելու մեջ:
Ու չնայած գլխավոր մեղադրյալը թրաֆիքինգի մեջ մեղադրվող Համլետ Դավթյանն է, սակայն նրա մասով գործն անջատել են առանձին վարույթ, քաղցկեղ ունենալու անվան տակ թողել ազատության մեջ, իսկ տուժող ճանաչված աղջիկներին` հավանաբար թողել նույն կարգավիճակում` Կիևյան փողոցի «կլիենտների» քմահաճույքին:
Ի դեպ, Համոյի` աղջիկ ներգրավելու և աշխատեցնելու մեխանիզմը յուրահատուկ է. ոմանց որպես «հարս» բերել է տուն, մի թեթև սեր խոստացել, հետո հենց «սերը» դարձել է «թթվասեր», ասել է` ընտանիքս ծանր վիճակի մեջ է, դուրս արի Կիևյան` ցերեկները մի քիչ պոռնկությամբ զբաղվիր, գիշերները` տուն արի… փողով: Դե նրանք էլ հանուն «սիրո» ու երևի էլի ինչ-որ բանի, բարեմասնությունների ու դրանց ծառայությունների ինքնարժեքները որոշած` դուրս են եկել մայրաքաղաքի խաչմերուկներ` Արմանի ընտանիքի «ծանր» հոգսը թեթևացնելու: Այդպես եղել է մինչ Արմանի և Համլետի համատեղ աշխատանքը, իսկ Արմանը «հարսներին» հսկողի կարգավիճակում է հայտնվել 2010-ին: Մինչ այդ Արմանը հասցրել է զարմանալ իր հետ հեռավոր բարեկամական կապ ունեցող, նախկինում թղթե տոպրակի վաճառքի գումարով ապրող Համլետի ընտանիքի նյութական վիճակի բարելավմամբ: Համլետ Դավթյանը շքեղ առանձնատուն, մեքենաներ է ունեցել, կազինոներում էլ լիքը փողեր ծախսել ու շահել: Արմանի մայրը` Գոհար Գալստյանը օրեր առաջ պատմում էր, որ Արմանը «Համոյի աղջիկներին»` Ինեսային (անունները փոխված են) ու Նանարին, ճանաչել է այնքանով, որ նրանք միշտ եղել են Համլետի կողքին: Իմացել են, թե Համոն Ինեսայի հետ պետք է ամուսնանա, և չեն իմացել, որ նա Կիևյան փողոցի խաչմերուկում մարմնավաճառությամբ է զբաղվում:
Ինեսան դատաքննական ցուցմունքում ասել է, որ ինքը Համլետի սանն է եղել, մարզվել է: Նա ապրել է Համոյի տանը, Էջմիածնի Հոկտեմբեր փողոցի 111 ա հասցեում` Համոյի հոր և մոր հետ: Դեռևս 2003-ին Համոն Ինեսային ասել է` «մենք նյութապես ծանր վիճակի մեջ ենք, դու պետք է ինձ օգնես, զբաղվես մարմնավաճառությամբ»: Եվ Ինեսան ամեն օր հասել է Կիևյան փողոց, գործն արել, ավարտել ու վերադարձել: «Էդ աղջիկը գնացել է, իրեն ծախել է, երեկոյան փողը բերել է, ամբողջ ընտանիքով լափել են»,- սա Արմանի մոր ավելի պատկերավոր բացատրությունն էր: «Հարս» Ինեսան իր ցուցմունքում նշել է Համոյի հետ ազնվորեն և անվտանգ աշխատելու մեխանիզմը. «Հեռախոսի նաուշնիկներով Համոն տնից հսկում էր իմ ամեն մի խոսակցությունը կլիենտի հետ: Գնի մասին պայմանավորվածությունը Համոն իմանում էր, ու ես իրավունք չունեի անջատեի հեռախոսը:
Իմ ամեն քայլին ինքը հետևում էր: Աշխատել եմ մինչև 2006 թվականը: Հետո այդտեղ կանգնեց նաև Օկսաննա անունով մի աղջիկ: Համոն իմացավ էդ մասին: Համոն ասում է` ինձ կծանոթացնե՞ս Օկսաննայի հետ, ու ծանոթանում են: Ինձ հետ սկսեց աշխատել նաև Օկսաննան, ես իմ ամբողջ եկամուտն էի տալիս Համոյին, Օկսաննան 50/50 էր աշխատում»: Հետո Օկսաննան սիրահարվել է մի տղայի, գործը թողել ու հեռացել է համատեղ բիզնեսից: Ինեսայի ցուցմունքի համաձայն՝ Համոն աշխատել է իր կարգավիճակի 9 աղջիկների հետ, որոնց համար տներ է վարձել Աբովյան, Ամիրյան, Կիևյան փողոցներում: Իսկ Նանարը 2008-ին է հայտնվել Համոյի կյանքում. նրան «որսացել է» թերթում տված աշխատանքի հայտարարությամբ: Սկզբում ընդունել է աշխատանքի որպես քարտուղարուհի, հետո սիրահետել, սեր-մեր խոստացել, որոշել են ամուսնանալ, բայց հենց Նանարը տրվել է Համոյին, վերջինս նրան էլ է հանել «տռաս»` ընտանիքի ծանր վիճակը թեթևացնելու: Եվ Նանարը զբաղվել է…իմացաք ինչով: Համենայնդեպս Նանարն այդպես է նշել իր ցուցմունքում: Պաշտպանական կողմի հարցերին ի պատասխան` նշել են, որ օրական 100-300 հազար դրամ փող են աշխատել ու տվել Համոյին: Դե եթե դրա միջինը բազմապատկեք ամսվա օրերով, ամիսներն էլ` աշխատած տարիների թվով` կտեսնեք, թե ինչպես է Համոն բարգավաճել ու կազինո գնացել:
Հետո Համոն Ինեսայի հետ մի աղջիկ էլ Ռոստովից է բերել` նույն նպատակով. Դոնեցկի բնակիչ Կատյան ևս Հայաստանում սկսել է զբաղվել նույն գործով, սակայն արդեն դատական փուլում` Ուկրաինայից ուղարկած իր գրությամբ դատարանին տեղեկացրել է, որ իրեն տուժող է համարում ոչ թե Համլետից, այլ Ինեսայից, քանի որ քրտնաջան աշխատած իր գումարը միշտ վերջինիս է տվել: Այսինքն` Արմանը նման փողային գործերի հետ կապ չի ունեցել, Համլետն է Ինեսայի հետ զբաղվել: Հիմա անհայտ է` ազատության մեջ գտնվող այդ անձինք այս պահին Կիևյան հանելու «ապրանք» գտե՞լ են…
Ի դեպ, Արմանի մոր` Գոհար Գալստյանի խոսքով, Համլետ Դավթյանի ազատման համար հնարավոր է` հիմք է դարձել նաև այն, որ նա Բարգավաճ Հայաստան կուսակցության անդամ, գործարար Հրանտ Դավթյանի հորեղբոր որդին է: Հրանտ Դավթյանն էլ մտադիր է մեծամասնական ընտրակարգով առաջադրվել ԱԺ ընտրություններում, և այդ առիթով վերջերս իր օբյեկտում` «Մուսալեռ» ռեստորանում հանդիպել է Գագիկ Ծառուկյանի հետ:
Փետրվարի 15-ին պաշտպանական կողմը հանդես կգա ճառով: