ՀՀ ԱԳ նախարար Էդվարդ Նալբանդյանը երեկ Հանրային հեռուստատեսության «Իրական քաղաքակականություն» հաղորդաշարին տված հարցազրույցում անդրադառնալով ԼՂ խնդրի կարգավորման թեմային նշել է. «Գիտեք, այսօր բանակցությունների սեղանին գտնվում է 3 սկզբունք և 6 տարր: Այդ 6 տարրերը պարունակվում էին եռանախագահող երկրների նախագահների հայտարարությունների մեջ թե լ’Աքվիլայում և թե Մուսկոկայում:
Ի՞նչ են ասում միջազգային հանրությունը, միջնորդները: Ի՞նչ է ասում Հայաստանը: Միջազգային հանրությունը, միջնորդները ասում են: Ասում են այդ սկզբունքները, այդ տարրերը, այդ առաջարկները մշակվել են և առաջարկվել են որպես մեկ ամբողջություն: Եվ տարանջատել որևէ այդ տարրերից կամ սկզբունքներից որևէ մեկը մյուսներից կամ առավելություն տալ, գերակայություն տալ մյուսների հանդեպ սխալ է և անընդունելի: Ի՞նչ է ասում Հայաստանը: Հայաստանը ասում է, որ ընդունում է այդ առաջարկները, այդ սկզբունքները, այդ տարրերը, որպես հիմք՝ կարգավորման բանակցությունների համար և ընդունում է որպես ամբողջություն: Այսինքն մենք ասում ենք այն, ինչ ասում է միջազգային հանրությունը: Իսկ ի՞նչ է ասում Ադրբեջանը: Կարծում եմ, որ իրենք էլ չեն հասկանում ինչ են ասում: Ասում են «այո, բայց», «այո սակայն», «այո ,երևի ոչ»: Պարզ պատասխան է հարկավոր` «Այո կամ Ոչ», ընդունում եք այս առաջարկները թե ոչ: Միջազգային հանրությունը ասում է, որ պետք է գնալ խաղաղ կարգավորման: Հայաստանը ասում է՝ այլընտրանք չկա խաղաղ կարգավորմանը:
2010 թվականին նորից վերահաստատվեցին միջազգային հանրության այն մոտեցումները, որ 2008 թվականից արդեն ակնհայտ էին, և ներառված էին 2008 թվականի դեկտեմբերին ԵԱՀԿ-ի 56 նախարարների հայտարարության մեջ Հելսինկիում, ապա 2009 թվականի դեկտեմբերին Աթենքում և 2010 թվականին Ալմաթիում, ԵԱՀԿ արտգործնախարարների հանդիպման շրջանակներում եռա նախագահող երկրների պատվիրակությունների ղեկավարների, արտգործնախարարների մակարդակով արված հայտարարության մեջ: Այս ամենը ընդգծվեց նաև 2010 թվականին Մուսկոկայում` նախագահներ Դմիտրի Մեդվեդևի, Բարաք Օբամայի և Նիկոլա Սարկոզիի հայտարարությունում, Աստրախանում Հայաստանի, Ռուսաստանի և Ադրբեջանի նախագահների կողմից ընդունված հռչակագրում, Աստանայում Միացյալ Նահանգների, Ռուսաստանի, Ֆրանսիայի, Հայաստանի և Ադրբեջանի հնգակողմ հայտարարության մեջ: Ես կարող եմ ևս մեկ անգամ ասել, որ այս բոլոր հայտարարությունները և նրանցում պարունակվող մոտեցումները համահունչ են Հայաստանի դիրքորոշոմանը:
Ի՞նչ է ասում Ադրբեջանը: Աստանայում հնգակողմ հայտարարությունից հետո ադրբեջանական պատվիրակությունը մեծ ջանքեր գործադրեց, որ այն հայտարարությունը ոչ միայն չողջունվի մյուս երկրների կողմից, այլ նաև ընդհանրապես չհիշատակվի եզրափակիչ փաստաթղթերում»:
Այնուհետև Է.Նալբանդյանը շարունակել է. «Եվ դրա համար եմ ես ասում, որ 2010 թվականը այն տարին է, երբ առավել ակնհայտ դարձավ մեր՝ Հայաստանի կառուցողական և Ադրբեջանի ոչ կառուցողական մոտեցումը: Այսինքն այսօր Ադրբեջանը, չնայած նրան, որ ձևացնում է, որ ինչ-որ մեկը պաշտպանում է իր դիրքորոշումները, իրականում հակադրվել է միջազգային հանրության կարծիքին: Այսօր բոլոր միջազգային կազմակերպությունները, որոնք զբաղվում են Լեռնային Ղարաբաղի հիմնախնդրի կարգավորմամբ, կառույցները, երկրները ունեն այն մոտեցումները, այն դիրքորոշումները, որոնք համահունչ են Հայաստանի դիրքորոշմանը»: