«Հայկական ժամանակ»-ի լրագրող Հայկ Գևորգյանի կալանքի փաստով ոստիկանության պարզաբանումը ոչ միայն չի բավարարում, այլև ավելացնում է կասկածները և կարծես ապացուցում է, որ նրա դեմ «գործ են սարքում»: «Առաջին լրատվական»-ի հետ զրույցում նման տեսակետ հայտնեց Lragir.am էլեկտրոնային պարբերականի խմբագիր Հայկազն Ղահրիյանը:
«Ինչ ասես արժե այդ պարզաբանման մեջ միայն այն նախադասությունը, որտեղ ասվում է, թե քաղաքացուն իբր վրաերթի ենթարկելուց հետո Հայկը իջել է մեքենայից և վրաերթի ենթարկվածին սպառնացել, թե ոստիկանություն կկանչի: Ոստիկանապետը բազմիցս հայտարարել է, որ պետք է բարձրացնի հասարակության վստահությունը ոստիկանության հանդեպ, սակայն նման գործողություններն ավելի են իջեցնում ոստիկանության հանդեպ առանց այն էլ գրեթե զրոյական վստահությունը»,- ասաց նա:
Հարցին՝ կարո՞ղ ենք արձանագրել, որ նախընտրական շրջանում լրագրողների նկատմամբ բռնաճնշումները մեկնարկել են, Ղահրիյանը նշեց. «Չէի ցանկանա, որ նման բան լիներ, սակայն ներկայիս նախընտրական շրջանը դեռ չսկսած՝ արդեն բախվում ենք նման իրավիճակի: Գոյության իրավունք ունեն այն տեսակետն ու կարծիքները, դատելով նաեւ ոստիկանության անհամոզիչ պարզաբանումներից, որ այս պարագայում գործ ունենք մանր վրեժխնդրության հետ: Սակայն, մյուս կողմից, դատելով համակարգի որակներից, չի բացառվում, որ վրեժխնդրությունը դառնա նաև նախընտրական քաղաքականություն»:
Ամփոփելով՝ Lragir.am էլեկտրոնային պարբերականի խմբագիրն ընդգծեց, որ լրատվամիջոցները Հայկ Գևորգյանի հետ կապված իրավիճակը կպահեն ուշադրության կենտրոնում և խնդիրը կդիտարկեն քաղաքացիական իրավունքների ու ազատությունների համատեքստում: «Այսինքն, իմ կարծիքով, պետք չէ «հերոսացնել», պետք է կիրառել իրավունքի պաշտպանության ճիշտ մեխանիզմներ, որի դիմաց անզոր կլինի ցանկացած բռի ուժ»,- ասաց Lragir.am էլեկտրոնային պարբերականի խմբագիրը: