«Իվան Վիկուլով» բեռնանավի անձնակազմի անդամները, որի վրա հրդեհ էր բռնկվել, նախնական տվյալներով՝ Ռուսաստանի քաղաքացիներ են: Այս մասին հայտնում է Ուկրաինայի արտակարգ իրավիճակների նախարարությունը։
«Ռիա Նովոստի»–ն տեղեկացնում է, որ տվյալ պահին անձնակազմի 14 անդամներից տասը ուղղաթիռով էվակուացվել են Սիմֆերոպոլ: Նավի վրա մնացել է վթարային թիմը, այդ թվում՝ նավապետը:
«Փրկվածների վիճակը նորմալ է»,-ասել է ԱԻՆ ղրիմյան բաժանմունքի լրատվական ծառայության ներկայացուցիչը:
Ըստ աղբյուրների՝ 140 մետրանոց նավի հետնակողմում հրդեհը բռնկվել է պայթյունից հետո: Պայթյունի պատճառը դեռ պարզ չէ:
Բեռնանավը հունվարի 28-ից Ազովի ծովում սեղմված էր սառույցներով:
Ավելի վաղ Ուկրաինայի ԱԻՆ–ի ներկայացուցիչը հայտնել էր, որ Կերչի նեղուցում Ղրիմի ափից մոտ 60 կմ հեռավորության վրա այրվում է «Իվան Վիկուլով» բեռնանավը, որի վրա 14 մարդ կա:
