Հոկտեմբերի 7-ին Ավստրիական ավիաուղիների Վիեննա-Երեւան չվերթի ուղեւորների գրանցման ժամանակ տոմսը ձեռքին ՀՀ քաղաքացուն ինքնաթիռում տեղ չլինելու պատճառաբանությամբ այդպես էլ չհաջողվեց նստել ինքնաթիռ: Միջադեպին ականատես է եղել «Ժառանգություն» խմբակցության պատգամավոր Անահիտ Բախշյանը, ով պահանջել է վերականգնել քաղաքացու իրավունքները, սակայն կրկին վկայակոչվել է ինքնաթիռում տեղ չլինելու հանգամանքը: Պատգամավորը բարձրացել է ինքնաթիռ եւ պարզել, որ իրականում առնվազն 5 ազատ տեղ է եղել այնտեղ:
Պատգամավորը վերոնշյալի առնչությամբ նամակ է ուղարկել Ավստրիական ավիաուղիների Երեւանյան գրասենյակի տնօրենին: Համաձայն ընկերության ս.թ. հոկտեմբերի 18-ի պատասխանի` ուղեւորին սպասարկել չկարողանալու հանգամանքը պայմանավորված է ԵՄ ԵԽ 261/04 կանոնակարգով եւ Եվրոպական հանձնաժողովի սահմանած պարտավորություններով, այն է` ընկերությունը ստիպված է ժամանակավորապես սահմանափակել նստատեղերի տրամադրումն ուղեւորներին, նույնիսկ երբ առկա են ազատ տեղեր: Իսկ տվյալ քաղաքացուն թռիչքը մերժելը պայմանավորված է եղել վիճակագրական ընտրությամբ: Նամակում նաեւ նշվել է, որ ընկերությունն աշխատում է ծառայության որակը բարձրացնելու ուղղությամբ: