Բրազիլիայի հյուսիսարևելյան Բաիյա նահանգի Սալվադոր քաղաք են շարժվել ավելի քան 1500 զինծառայողներ՝ ոստիկանության գործադուլի հետևանքով նահանգում սկսված անկարգությունները ճնշելու համար: Այս մասին հաղորդում է РИА Новости-ն, վկայակոչելով երկրի կառավարության մամլո ծառայությունը:
Բաիյա նահանգում ոստիկանության գործադուլը սկսվել է հունվարի 30-ին: Տեղի ԶԼՄ-ների տվյալներով, դրա հետևանքով նահանգում կտրուկ բարձրացել է հանցագործությունների և բռնությունների մակարդակը:
Այսպես, 12 ժամվա ընթացքում մեկուկես միլիոնանոց քաղաքում գրանցվել է 20 սպանություն: Բացի այդ, մեծացել է գողությունների թիվը:
Զինվորականները և Ազգային գվարդիայի ուժերը պարեկություն են սահմանել փողոցներում՝ հասարակական կարգը պահպանելու համար:
Բրազիլիայի բանակի հաղորդագրության համաձայն՝ շարքային զորամասերից բացի, Սալվադոր են տեղափոխվել նաև ռազմական գործողությունների մեծ փորձ ունեցող օդադեսանտային ուժեր Ռիո դե Ժանեյրոյից:
