Ամերիկյան հեղինակավոր CNN հեռուստաալիքը ռեպորտաժ է պատրաստել Բեյրութի հայկական Բուրջ Համուդ թաղամասի և այնտեղ մեծացած հայազգի ռեժիսոր Նիկոլ Բեզջյանի մասին:
Նիկոլ Բեզջյանը ծնվել է Սիրիայում, մեծացել է Լիբանանում, ուսում ստացել Միացյալ Նահանգներում, բայց նա ոչ մի տեղ իրեն այնքան լավ չի զգում, որքան «Փոքրիկ Հայաստանում», պատմում է CNN-ի թղթակիցը:
«Փոքրիկ Հայաստան» ասում են Բեյրութում գտնվող Բուրջ Համուդ թաղամասին, որը հիմնականում հայաբնակ է: Թաղամասը ձևավորվել է 1930 թ.՝ 1915 թ. ջարդերից և Օսմանյան կայսրության փլուզումից հետո Բեյրութ տեղափոխված հայ գաղթականների կողմից:
77-ամյա ռեժիսորը CNN-ի թղթակիցների հետ շրջել է Բուրջ Համուդի իր ամենասիրելի վայրերով՝ նրանց ցույց տալով հայկական ռեստորանը, եկեղեցին, արվեստի պատկերասրահը, գրախանութը:
«Եթե դուք հարցնեք՝ ով եմ ես (ինչ ազգության եմ պատկանում.- 1in.am), ես կպատասխանեմ՝ ես հայ եմ: Բուրջ Համուդը նշանակալի դեր է խաղացել հատկապես 1950-ականներից հետո, այստեղ է ծնվել հայկական հայրենասիրությունը… այստեղ է վերածնվել հայկական գրականությունը»,- ասել է ռեժիսորը:
Հյուրերին տանելով Բուրջ Համուդի հայկական եկեղեցի՝ Բեզջյանը հիշեցրել է իր «Մյուռոն» ֆիլմը՝ պատմելով մյուռոնի պատրաստման և դրա նշանակության մասին:
Հյուրերը ռեժիսորի ուղեկցությամբ այցելել են նաև հայկական ռադիոկայան, որտեղ լուրերը հեռարձակվում են հայերենով: