Ավստրալիայի արևելքը ջրհեղեղների հետևանքով հայտարարվել է աղետի գոտի, հաղորդում է ABC News հեռուստաալիքը: Քվինսլենդ նահանգի ավելի քան 11 հազար մարդ և Նոր Հարավային Ուելս նահանգի 7 հազար մարդ հայտնվել են մեկուսացման մեջ:
Քվինսլենդի իշխանությունները դիմել են զինվորականներին՝ խնդրելով օդից օգնություն ցուցաբերել: Տուժած տարածքների բնակիչներին տարհանում են ռազմական ուղղաթիռներով:
Ռոմա քաղաքում սկսել է ջրի տակ անցնել տարհանման կենտրոնը, որտեղ հավաքվել է 300 մարդ: Նրանց փրկելու համար իշխանություններն ուղղաթիռ են ուղարկել, որը աղետյալներին տեղափոխում է այլ կենտրոն: Ռոմայում ջրի մակարդակը հասել է ռեկորդային՝ 8.5 մետրի:
Քվինսլենդի Չարլվիլ քաղաքում փետրվարի 4-ին ջրի մակարդակը կարող է հասնել քաղաքի ջրամբարին: Նահանգի մեկ այլ քաղաք՝ Միտչելը, արդեն 75%-ով անցել է ջրի տակ:
Ավստրալիայի արևելքում հորդառատ անձրևների պատճառով աշխատանքները դադարեցրել են 4 ածխահանքեր: Հանքերն առայժմ ջրով ողողված չեն, և սարքավորումները վնասված չեն:
Վերջին օրերի ընթացքում Ավստրալիայի արևելքում տեղումների քանակը հասել է ռեկորդային՝ 132 մմ-ի: Ըստ օդերևութաբանների՝ անձրևները առաջիկա օրերին կշարունակվեն:
Հիշեցնենք, որ 2011թ. Ավստրալիայի արևելյան նահանգներում ջրհեղեղի հետևանքով զոհվեց 35 մարդ:
