Ոստիկանությունը հետևողական գործողությունների շարք էր մշակել: «Առաջին լրատվական»-ի հետ զրույցում նման տեսակետ հայտնեց «Երկիր» օրաթերթի գլխավոր խմբագիր Բագրատ Եսայանը`անդրադառնալով «Հայկական ժամանակ» օրաթերթի թողարկման պատասխանատու Հայկ Գևորգյանի կալանավորմանը:
Բագրատ Եսայանի համար հասկանալի չէ, թե ինչպես է ոստիկանությունը նրան հրավիրել բացատրություն տալու, իսկ հետո հետախուզում հայտարարել: Ըստ նրա` հասկանալի չէ նաև, թե ինչպես կարող է մարդը հինգշաբթի օրը ոստիկանների կողմից պահպանվող կառավարության շենքում լուսաբանել կառավարության նիստը և համարվի հետախուզման մեջ:
«Այստեղ ոստիկանությունը հետևողական գործողությունների շարք է մշակել, որը հնարավորություն կտա Հայկ Գևորգյանին կալանավորելու և մեկուսացնելու: Ես շատ կցանկանամ, որ դա իսկապես կապված չլինի նրա մասնագիտական գործունեությունը կասեցնելու հետ, իսկ ավելի պարզ՝ ազատ խոսքի արտահայտման իրավունքը սահմանափակելու հետ»,- նշեց Բագրատ Եսայանը: Ըստ նրա՝ եթե հարմար առիթ լիներ, ցանկացած ժամանակ կարող էին նույնն անել: Նրա համոզմամբ` պարզապես հիմա առավել նպաստավոր է, որովհետև առջևում նախընտրական շրջանն է, և երևի թե ավելի մեծ ուրախությամբ են դա անում:
Այն հարցին, թե ինչպես պետք է լրատվամիջոցներն աջակցեն հայտնի լրագրողին, պատասխանեց, որ բոլոր լրատվամիջոցների ղեկավարներն առնվազն կարող են երաշխավորական մի նամակ գրել, որով պահանջեն Հայկի խափանման միջոցի փոփոփոխություն: «Ես ինքս պատրաստ եմ այդ նամակի տակ ստորագրելու և երաշխավորելու, որպես այս երկրի քաղաքացի, որպես թերթի գլխավոր խմբագիր, որ նա չի խուսափի քննությունից և կներկայանա առաջին իսկ պահանջով»,- ասաց «Երկիր» օրաթերթի գլխավոր խմբագիրը:
Ըստ Եսայանի՝ եթե դա էլ չօգնի, ապա լրատվամիջոցների ղեկավարների հետ պիտի քննարկեն հետագա գործողությունների հարցը: Հիշեցնենք, որ այսօր առավոտյան կալանավորվել է «Հայկական ժամանակ» օրաթերթի թողարկման պատասխանատու Հայկ Գևորգյանը: Նա այժմ պահվում է «Նուբարաշեն» ՔԿՀ-ում:
