Ինչպես հայտնում է լեհական TVN24 հեռուստաալիքը, լեհական նախագահի ինքնաթիռը վայրէջք է կատարել վատ եղանակային պայմաններում, իսկ որոշում կայացրել էր ոչ թե ինքնաթիռի հրամանատար Արկադիուշ Պրոտասյուկը, այլ Լեհաստանի ռազմաօդային ուժերի գլխավոր հրամանատար Անջեյ Բլասիկը, որը նույնպես գտնվում էր օդանավում: Այս կարծիքը հեռուստաընկերությանն է հայտնել տրանսպորտային ավիացիայի թիվ 36 հատուկ գնդի հրամանատ Ռոբերտ Լատկովսկին:
Որպես պատճառների համախմբի բաղկացուցիչ մաս՝ նա ավելացրել է դիսպետչերների սխալները:
«Եղանակը հնարավորություն չէր տալիս ինքնաթիռին վայրէջք կատարել: Սխալ որոշում է կայացրել ՌՕՈւ գլխավոր հրամանատարը, որը պատասխանատու էր այդ չվերթի համար: Նա ինքնաթիռի մեջ էր, հետևաբար նաև՝ նախագահի և մյուս ուղևորների անվտանգության երաշխավորը: Անհրաժեշտ էր հետաձգել թռիչքն ու սպասել, մինչև եղանակը կլավանար, կամ թռչել պահեստային օդանավակայան»,- ասել է Լատկովսկին:
Նա նաև նշել է Սմոլենսկի օդանավակայանի դիսպետչերների աշխատանքը, որոնք նույնպես սխալներ են թույլ տվել: «Դիսպետչերներն իրավունք չունեին թույլ տալու վայրէջքն այդ պայմաններում»,- ասել է Լատկովսկին: Նա նշել է որ դիսպետչերների մոտ խառնաշփոթ է եղել, նրանք չեն իմացել՝ ընդունե՞լ օդանավը, թե՞ ոչ, քննարկել են այդ հարցը Մոսկվայի հետ:
Հիշեցնենք, որ Լեհաստանի նախագահ Լեխ Կաչինսկու օդանավը վթարի էր ենթարկվել ռուսական Սմոլենսկ քաղաքի մերձակայքում վատ եղանակային պայմաններում օդանավի վայրէջք կատարելու ժամանակ: