Իրանական Press TV-ի փոխանցմամբ՝ Իրանի իշխանությունները վիրավորական են որակել Samsung-ի նոր գովազդը, որը պատրաստել է իսրայելական Hot մալուխային օպերատորը: Նրանք սպառնացել են մասնակի արգելք դնել հարավկորեական ընկերության ապրանքի վրա:
Գովազդում երևում է, թե ինչպես են հանրահայտ Asfur հեռուստաշոուի 4 դերասաններ հագնում կանացի հագուստ և ժամանում Իրան: Սրճարաններից մեկում նրանք հանդիպում են իսրայելական «Մոսսադ» հետախուզության գործակալի հետ, որը իր պլանշետով սերիալ էր դիտում:
Նա իր պլանշետը ցույց է տալիս հագուստը փոխած դերասաններին, և հենց այդ պահին նրանցից մեկը պլանշետում բացում է մի ծրագիր և պայթեցնում իրենց թիկունքում գտնվող միջուկային կայանը:
Գովազդի վերջում կադրից դուրս հնչում են հետևյալ խոսքերը. «Ի՞նչ է, և՞ս մեկ խորհրդավոր պայթյուն Իրանում»:
Իրանի խորհրդարանի էներգետիկ գծով կոմիտեի ղեկավար Արսալան Ֆաթհիպուրը հայտնել է, որ այդ գովազդում Իրանը ներկայացված է որպես պարզամիտ հասարակություն, իսկ Իսրայելը՝ որպես հզոր պետություն, որն ունակ է հեշտությամբ ոչնչացնելու Իրանի միջուկային օբյեկտները կամ էլ սպանելու իրանցի ատոմագետներին:
Իսրայելական Haaretz թերթը գրել է, որ Samsung ընկերությունը հերքել է իրանական մեղադրանքները՝ ընդգծելով, որ որևէ առնչություն չի ունեցել այդ տեսանյութի նկարահանման հետ: