News Georgia-ի փոխանցմամբ՝ Վրաստանի նախագահ Միխեիլ Սաակաշվիլին ԱՄՆ-ում ելույթ է ունեցել Ջորջթաունի համալսարանում: Իր ելույթում Սաակաշվիլին նշել է.
«Վրաստանն աշխարհի քարտեզի վրա ամրագրվել է վերջին 15 տարիներին և չի պատրաստվում անկախության համար մղած պայքարի ուղին փոխարինել «ոսկյա վանդակով»: Մենք կարողացել ենք մեր տեղն ամրագրել աշխարհի քարտեզի վրա: Դա իսկապես ամենամեծ քայլն էր, որ մենք կատարեցինք վերջին 15 տարիների ընթացքում:
1990-ականներին Վրաստանը դժվարությունների մեջ էր: Նրան փրկեց 2003 թվականին իրականացված «Վարդերի հեղափոխությունը»: Բարեփոխումներ իրագործելը և հատկապես կոռուպցիայի ու հանցավորության դեմ պայքար սկսելը մեծ ռիսկ էր պահանջում:
Երբ ես մտա իմ աշխատասենյակ, իմացա, որ անգամ կառավարական չինովնիկներն աշխատավարձ չեն ստացել: Երկու շաբաթ անց ես ստացա իմ առաջին աշխատավարձը: Պատկերացնում եք, ես ստացա 40 դոլար:
Ես զարմացա, սակայն ինձ հայտնեցին, որ այդքան է նախագահի աշխատավարձը: Այդպիսի աշխատավարձ է ստացել նաև իմ նախորդը (Էդուարդ Շևարդնաձե): Այդ ժամանակ պետական գանձարանը դատարկ էր»:
Հիշեցնենք, որ Վրաստանում «Վարդերի հեղափոխությունը» տեղի է ունեցել 2003 թվականի նոյեմբերի 2-4-ը։ Հեղափոխության հիմնական մոտիվը 2003 թվականի նոյեմբերի 2-ի խորհրդարանական ընտրությունների կեղծումն էր։
«Վարդերի հեղափոխության» արդյունքում Վրաստանի նախագահ Էդուարդ Շևարդնաձեն վայր դրեց իր լիազորությունները, և երկրի ղեկավարությունն անցավ ընդդիմադիրներին, որոնց գլխավորում էր Միխեիլ Սաակաշվիլին։