Ֆրանսիայում Լիբիայի նախկին դեսպան Օմար Բրեբեշը, ամենայն հավանականությամբ, մահացել է հայրենիքում` կտտանքների ենթարկվելուց հետո: Այս մասին ասվում է Human Rights Watch կազմակերպության պաշտոնական կայքում:
Իրավապաշտպանները նշում են, որ դիվանագետը ձերբակալվել է Լիբիայի նոր իշխանությունների կողմնակիցների կողմից 2012 թվականի հունվարի 19-ին և մեկ օր անց մահացել է:
Դիահերձման նախնական եզրակացության համաձայն՝ Բրեբեշի մահվան պատճառը մարմնական բազմաթիվ վնասվածքներն են և կողոսկրի կոտրվածքը: Նկարներում, որը ստացել է իրավապաշտպան կազմակերպությունը, երևում են ճիպոտի հարվածների, խոր վերքերի հետքերը, երևում է նաև, որ նրանք հանել են դիվանագետի եղունգները:
«Լիբիացի որոշ նախկին ապստամբներ, ցավոք, շարունակում են կտտանքների ենթարկել և սպանել բանտարկյալներին»,-հայտարարել է Մերձավոր Արևելքում և Հյուսիսային Աֆրիկայում Human Rights Watch-ի ծրագրի տնօրեն Սառա Լի Ուիթսոնը:
«Այդ դաժան մարդիկ այդպես էլ տանջանքների են ենթարկելու մարդկանց, քանի դեռ նրանց պատասխանատվության չեն ենթարկել: Լիբիայի ղեկավարները պետք է ցուցաբերեն քաղաքական կամք և հետապնդեն այն մարդկանց, որոնք իրականացրել են լուրջ հանցանքներ, անկախ նրանց` ապստամբության ժամանակ ունեցած դերից»,- ավելացրել է նա:
Բրեբեշը Ֆրանսիայում Լիբիայի դեսպանատանն է աշխատել 2004-2008 թվականներին: Քադաֆիի վարչակարգի տապալումից հետո նա շարունակել է աշխատել Լիբիայի Անցումային կառավարության արտաքին գործերի նախարարությունում: