Այսօր ԱԺ-ում ասուլիս էր հրավիրել ՀՅԴ խմբակցության ղեկավար Վահան Հովհաննիսյանը:
Նա նշեց, որ հունվարի 23-31-ը տեղի է ունեցել «Եվրանեսթ»-ի հանձնաժողովներից մեկի նիստը, և երեք շաբաթ հետո այն տեղի կունենա Երևանում:
«Նոր ասպարեզներ են բացվում: Պատվիրակությանը հաջողվել է մասնակցել Արտաքին հարաբերությունների հանձնաժողովի նիստին, որտեղ Ադրբեջանի և Հայաստանի մասին զեկույցներ են ներկայացվել:
Հայաստանի վերաբերյալ զեկույցը բավական դրական էր, ինչը չի կարելի ասել Ադրբեջանի վերաբերյալ զեկույցի մասին: Դա առաջացրել է որոշ պատգամավորների դժգոհությունը, մասնավորապես դժգոհել են Հայաստանի իրավական վիճակից և Հայաստանի` ՌԴ-ի հետ համագործակցության մակարդակից:
Պրոադրբեջանական պահանջը՝ ԼՂ խնդիրը արտացոլել փաստաթղթի մեջ, չանցավ»,- նկատեց Վ. Հովհաննիսյանը և ողջունեց այն տեսակետը, որ Եվրոպական խորհրդարանը չպետք է անդրադառնա այս խնդրին:
Անդրադառնալով հանձնաժողովների նիստերին` Վ. Հովհաննիսյանը նշեց, որ դրանք հիմնականում խաղաղ են անցել՝ բացի մի դեպքից, երբ ադրբեջանցիները փորձել են վստահեցնել, թե Հայաստանի տնտեսական ծանր վիճակը պայմանավորված է Ադրբեջանի հետ փակ սահմանով:
«Քաղաքական հանձնաժողովը հրավիրել էր ԵԱՀԿ ԺՀՄԻԳ-ի ներկայացուցչին, ով վստահեցրել է, որ մեծ թվով դիտորդներ են մասնակցելու ՀՀ առաջիկա ընտրություններին: Ընդ որում, խոսելով համամասնական հարյուր տոկոսանոց ընտրակարգի մասին՝ նշեց, որ դա յուրաքանչյուր երկրի ներքին գործ է: Միաժամանակ նա շատ կարևոր հայտարարություն արեց, ըստ որի՝ ակնհայտ է, որ մեծամասնականը հակասում է ՀՀ-ում կուսակցությունների մասնակցության հավասարությանը»,- նկատեց Վ. Հովհաննիսյանը:
Եվրոպական խորհրդարանի մակարդակով որոշում է կայացվել ստեղծել Ժողովրդավարության համար եվրոպական ֆոնդ, որն աշխատելու է Արևելյան Եվրոպայի երկրներում, այդ թվում և Հայաստանում:
