ՀՀԿ 13-րդ համագումարը տեղի է ունենալու մարտի 10-ին:
Համագումարի ընթացքում կընտրվի գործադիր մարմին, կքննարկվեն կազմակերպչական բնույթի հարցեր: ՀՀԿ կայանալիք համագումարում կլինեն նաև քաղաքական շեշտադրումներ` կապված ԱԺ առաջիկա ընտրությունների հետ: Այսօր կայացած մամուլի ասուլիսին տեղեկացրեց ՀՀԿ-ական պատգամավոր Հովհաննես Սահակյանը:
«Միաժամանակ, ՀՀԿ համագումարի օրը ձգձգվում էր զուտ տեխնիկական պատճառներով: Սա լուրջ և ժամանակատար աշխատանք է»,- նշեց պատգամավորը:
Սահակյանի դիտարկմամբ՝ հայաստանյան ներքաղաքական կյանքը մտել է նախընտրական շրջան: «Քաղաքական ուժերը բանակցում են հնարավոր դաշինքների շուրջ: Իմ գնահատականով՝ որքան մոտենա ընտրությունների օրը, կուսակցություններն առավել կազմակերպված կլինեն: Այս ընթացքում կլինեն նաև ընդդիմադիր ելույթներ: Դրանք ժողովրդի մոտ ընդունելի և ընթեռնելի են»,- նկատեց խորհրդարանականը:
Անդրադառնալով կոալիցիոն նոր հուշագրի ստորագրման հնարավորությանը՝ Սահակյանը նկատեց, որ հուշագիրը, որպես այդպիսին, այս փուլում երկրորդական տարր է:
«Բայց եթե նոր հուշագրի անհրաժեշտություն լինի, այն անպայման կստորագրվի: Այս փուլում շատ ավելի կարևոր է, որ կոալիցիան կատարում է իր գործառույթները:
Ճիշտ է, կոալիցիայի ներսում որոշակի հրաձգություններ կարող են տեղի ունենալ, դրանք, սակայն, չեն ազդի և մինչ օրս չեն ազդել կոալիցիայի գործունեության վրա»,- նշեց նա:
Ամփոփելով` պատգամավորը անդրադարձ կատարեց նաև ԲՀԿ պատգամավոր Վարդան Բոստանջյանի` նախօրեին հայտնած այն մտքին, թե ԲՀԿ-ն առիթ չունի հաջորդ տարի կայանալիք նախագահական ընտրությունների ժամանակ չսատարելու Սերժ Սարգսյանին:
«Գուցե դա ԲՀԿ-ի ներքին կարգապահական խնդիրն է, և նրանք պիտի որոշեն` ով պետք է հայտարարի Սերժ Սարգսյանին աջակցելու մասին»: