Վենեսուելայի նախագահ Ուգո Չավեսը «ծիծաղելի» է համարել Մեծ Բրիտանիայի դիրքորոշումը Ֆոլքլենդի (Մալվինյան) կղզիների նկատմամբ: Ինչպես հաղորդում է ИТАР-ТАСС-ը, ելույթ ունենալով Կարակասում՝ Վենեսուելայի նախագահը նշել է, որ «Մալվինյան կղզիները պատկանում են Արգենտինային» և առաջարկել է բրիտանացիներին թողնել այն:
Հիշեցնելով 30 տարի առաջ կղզիների համար Արգենտինայի և Մեծ Բրիտանիայի միջև բռնկված զինված հակամարտությունը՝ Չավեսը հայտարարել է, որ «ժամանակները փոխվել են», և «այժմ Արգենտինան միայնակ չի մնա»: «Թող հին կայսրությունը չկարծի, թե Արգենտինան միայնակ է, ինչպես 30 տարի առաջ, այժմ նրա հետ է Հարավային Ամերիկան, Լատինական Ամերիկան և մենք»,- հայտարարել է նա:
Հինգշաբթի Վենեսուելայի արտգործնախարարը հանդես է եկել հայտարարությամբ՝ քննադատելով Ֆոլքլենդյան կղզիներ էսկադրոնային ականակիր ուղարկելու՝ Մեծ Բրիտանիայի որոշումը: