ԱՄՆ նախագահ Բարաք Օբաման ԵԱՀԿ-ի Մինսկի խմբի նախկին համանախագահ Մեթյու Բրայզային նշանակել է Ադրբեջանում ԱՄՆ դեսպան: Բրայզայի նշանակումը ամերիկյան Սենատում սեպտեմբերին արգելափակել էին երկու հայտնի հայամետ սենատորներ` Բարբարա Բոքսերը և Ռոբերտ Մենենդեսը: Օբաման ԱՄՆ դեսպան է նշանակել նաև Թուրքիայում` Ֆրանկ Ռիչարդսոնին և Սիրիայում` Ռոբերտ Ֆորդին: Ուշագրավ է, որ Բրայզան Ադրբեջանում ամերիկյան դիվանագիտական առաքելության ղեկավար նշանակվեց Կոնգրեսի միջնստաշրջանային ընդմիջման ժամանակ, երբ ԱՄՆ նախագահը իրավունք ունի դեսպաններ նշանակել առանց Կոնգրեսի համաձայնության: ՀՅԴ Հայ դատի բյուրոյի և քաղաքական հարցերի գրասենյակի պատասխանատու Կիրո Մանոյանը, անդրադառնալով «Առաջին լրատվական»-ի հարցին, թե արդյոք այդ նշանակումը կապվա՞ծ չէ այն բանի հետ, որ Ադրբեջանի կշիռը ԱՄՆ-ի համար մեծացել է, ի տարբերություն Հայաստանի, ասաց. «Պետք է խնդրին նայել ոչ միայն Բրայզային նշանակելու տեսանկյունից: ԱՄՆ նախագահը նաև այլ նշանակումներ է արել`դեսպան նշանակելով նաև Թուրքիայում»: Կիրո Մանոյանը հիշեցնում է, որ ժամանակին ԱՄՆ նախագահի թեկնածու Բարաք Օբաման խոստումներ էր տվել հայ համայնքին Ցեղասպանության և Լեռնային Ղարաբաղի հարցերով: Եվ հիմա, ըստ դաշնակցական գործչի, ԱՄՆ նախագահը նշանակում անելով Կոնգրեսի միջնստաշրջանային նիստի ժամանակ, ցույց տվեց, որ մոռացել է իր երբեմնի խոստումները:
