ԱԺ ՀՀԿ-ական պատգամավոր Հովհաննես Սահակյանը չի բացառում, որ խորհրդարանական ընտրություններից առաջ կարող է կոալիցիոն նոր հուշագիր ստորագրվել: Այս մասին նա ասաց «Առաջին լրատվական»-ի հետ զրույցում՝ պատասխանելով այն հարցին, թե որքանով են հավաստի՞ տեղեկությունները, ըստ որոնց, փետրվարի 17-ին կոալիցիոն նոր համաձայնագիր է ստորագրվելու:
«Փետրվարի 17-ի մասով կոնկրետ ինֆորմացիա չունեմ: Միաժամանակ, որևէ խնդիր չեմ տեսնում, որ նոր հայտարարություն կամ հուշագիր ստորագրվի: Պարզ է, որ որքան ընտրությունները մոտենան, նման խոսակցությունները կշատանան, բայցևայնպես նման փաստաթղթի ստորագրում սպասելի է: Կոալիցիան պետք է որոշի՝ ԱԺ ընտրություններին առանձին, թե դաշինքով է գնում»,- ասաց Հովհաննես Սահակյանը:
Ամփոփելով՝ ՀՀԿ-ական պատգամավորը նշեց, որ կոալիցիոն նոր հուշագիր կարող է ստորագրվել, ասենք, ԱԺ ընտրություններից հետո: «Ոչ բացառում, ոչ էլ հերքում ենք նոր հուշագրի ստորագրման փաստը»,- ասաց նա:
Հիշեցնենք, որ կոալիցիոն հուշագիրը նախագահական նստավայրում ստորագրվել էր 2011 թվականի փետրվարի 17-ին: ՀՀԿ անունից այն ստորագրել էր Սերժ Սարգսյանը, ՕԵԿ-ից` Արթուր Բաղդասարյանը, ԲՀԿ-ից` Գագիկ Ծառուկյանը: Կոալիցիոն հուշագրում, մասնավորապես, նշվում է, որ քաղաքական կոալիցիան նախագահական ընտրություններում հանդես կգա միասնական թեկնածուով` ի դեմս գործող նախագահի: