Հունաստանի ուղղափառ եկեղեցու առաջնորդն այսօր զգուշացրել է, որ երկրում մեծ չափերի հասնող աղքատությունը կարող է հանգեցնել «հասարակական պայթյունի»:
Associated Press-ը գրում է, որ Հիերոնիմոսը երկրի վարչապետ Լուկաս Պապադիմոսին ուղղված նամակում գրել էր, որ աղքատությունն ու անգամ սովը հասել են մղձավանջային չափերի: Նա ավելացրել է, որ «համբերությունը հույների շրջանում գնալով նվազում է, և հասարակական պայթյունի վտանգն այլևս չի կարելի անտեսել»:
Հոգևոր առաջնորդը գրել է, որ խիստ տնտեսական միջոցառումները, որոնք իրականացվում են երկրում, կարող են ճակատագրական լինել ազգի համար և ոչ մի օգուտ չտալ:
Հիշեցնենք, որ եվրոպական պարտքային ճգնաժամի պատճառով Հունաստանը կանգնած է սնանկացման եզրին:
