Իրանական Mehr News լրատվական գործակալության փոխանցմամբ՝ Իրանի հոգևոր առաջնորդ, այաթոլլահ Ալի Խամենեին պաղեստինցի ակտիվիստների հանդիպման ժամանակ հայտարարել է, որ Սիրիայի դեմ ամերիկյան դավադրությունը դառնում է ակնհայտ.
«Սիրիայում ամերիկյան պլանի գլխավոր նպատակը տարածաշրջանում դիմադրության առաջին գծին հարված հասցնելն է, քանի դեռ Սիրիան աջակցում է Պաղեստինին ու Լիբանանին: Եթե պաշտոնական Դամասկոսը ԱՄՆ-ին խոստանա, որ դադարեցնում է Պաղեստինին ու Լիբանանին իր աջակցությունը, ապա անմիջապես կդադարի Սիրիայի շուրջ ողջ աղմուկը:
Ամերիկացիներն ու մի շարք եվրոպական երկրներ ցանկանում են վրեժխնդիր լինել Սիրիայից՝ իրենց տարածաշրջանային (մասնավորապես Եգիպտոս և Թունիս) պարտությունների համար: Իրանը Սիրիայում աջակցում է ժողովրդի օգտին կատարվող ամեն տիպի բարեփոխումներին և դեմ է ԱՄՆ-ի ու նրա դաշնակիցների կողմից Սիրիայի ներքին գործերին միջամտելուն»: