Գալիք ընտրություններով մենք կհասնենք հատակին, որից հետո կամ կխորտակվենք, կամ կբարձրանանք: Այսօր լրագրողների հետ հանդիպմանը նման տեսակետ հայտնեց ԼՂՀ ԱԳ նախկին նախարար Արման Մելիքյանը` խոսելով գալիք ընտրությունների արդար անցկացման մասին:
Բանախոսի համոզմամբ` ինչպես նախորդ ընտրությունները, այս ընտրությունները ևս արդար չեն կարող լինել: Նա կարծում է, որ ոչինչ չի փոխվել՝ բացառությամբ նրա, որ իշխանությունը կփորձի գործարքի մեջ մտնել ընդդիմության հետ: Ըստ Արման Մելիքյանի` գալիք ընտրություններով պատմության մի շատ կարևոր փուլ ենք ավարտում:
«ԱԺ ընտրությունները կլինեն վերջին ճահճային ընտրությունները, որովհետև կամ ընտրությունները անարդար են լինելու, կամ կլինի գործարք. երկու դեպքում էլ վնաս կհասցվի մեր պետականությանը: Այստեղ չկա քաղաքական զարգացում: Ես գտնում եմ, որ այս ընտրություններով մենք կհասնենք հատակին»,- ասաց ԼՂՀ ԱԳ նախկին նախարարը:
Անդրադառնալով իր մասնակցությանը խորհրդարանական ընտրություններին` նա ասաց, որ ոչ մեծամասնական, ոչ համամասնական ընտրակարգով չի մասնակցելու: Նա գտնում է, որ այս խորհրդարանից դուրս պետք է լինի մի քաղաքական հատված, որը հավուր պատշաճի կներկայացնի հասարակության ընդհանրական շահը, որը վատին վատ կասի, լավին` լավ:
Ըստ նրա` այսօր ՀՀ առաջնահերթ արժեքը սա է, որը պետք է պահպանվի: Իսկ այն ամենը, ինչ այսօր է տեղի ունենում, նրա գնահատմամբ, ուղղված է խոսքի ազատության և ճշմարտության դեմ:
«Առաջիկա մի քանի տարիների ընթացքում դրական ակնկալիքների հիմքեր մենք չունենք ոչ միայն ներքին, այլև արտաքին համապատասխան մթնոլորտի պատճառով»,- ցավով նշեց բանախոսը:
Խոսելով Վարդան Օսկանյանի՝ քաղաքականություն վերադարձի մասին` Ա. Մելիքյանն ասաց, որ դա իր որոշելիքն է: « Օսկանյանի համար բնականոն երևույթ է քաղաքականության մեջ լինելը: Դա իր իրավունքն է: Եթե նա նաև ընտրել է այն քաղաքական ուժը, որի հետ պետք է համագործակցի, դա էլ է իր որոշումը: Ես ոչինչ չեմ բացառում, նաև համագործակցությունը ԲՀԿ-ի հետ»,- ամփոփեց Արման Մելիքյանը:
: