Ամերիկացի նկարիչ Մայքլ Քելիին, որը հայտնի է իր մուլտիմեդիական ներկայացումներով, հունվարի 31-ին Կալիֆոռնիայում իր տանը մահացած են գտել:
Իրավապահ մարմինները ենթադրում են, որ 57-ամյա նկարիչը ինքնասպանություն է գործել, սակայն վերջնական եզրակացության մասին հայտնելու են դիահերձումից հետո: Այս վարկածին է հակված նաև Նյու Յորքի պատկերասրահի աշխատակից, Քելիի ներկայացուցիչ Հելեն Ուայները:
«Զարմանալի է, թե ինչպես մարդը կարող է դա անել, առավել ևս՝ մարդը, որն ուներ հաջողություն, ճանաչում, հեռանկարներ: Մայքն ժամանակակից արվեստում անհաղթելի ուժ էր: Անհնար է հավատալ, որ նա այլև չկա, սակայն մենք վստահ ենք, որ Քելիի ժառանգությունը շարունակելու է մարտահրավեր նետել նրան, ով կմրցակցի իր հետ»,- մեջբերում է Guardian-ը Ուայների խոսքերը:
Քելի տուն ոստիկանություն է կանչել նրա ընկերը, որին չի հաջողվել կապ հաստատել նկարչի հետ: Նա հայտնել է, որ Քելին սիրեցյալից բաժանվելու պատճառով վերջին ժամանակներս ընկճախտով էր տառապում:
Քելին ծնվել էր 1954 թվականի հոկտեմբերի 27-ին Դեթրոյդում: Սկզբնապես նա հետաքրքրված էր ոչ թե ժամանակակից արվեստով, այլ երաժշտությամբ, նվագել է Destroy All Monsters ռոք խմբում:
1978 թվականին տեղափոխվել է Լոս Անջելես, սովորել է Կալիֆոռնիայի արվեստի ինստիտուտում: Իր առաջին գործերում նա սկսել է խառնել բոլոր հնարավոր տեխնիկաները` քանդակը, նկարը, գեղանկարչությունը, ներկայացումը և տեքստերի ընթերցանությունը: Արդյունքում նա իրեն հայտարարել էր «գեղարվեստական արտադրության անարխիստ»:
Քելիի գործերը հանդիսատեսի մոտ տարբեր զգացումեր են առաջացնում. նրա գործերում փիլիսոփայական և քաղաքական ենթատեքստը ներկայացված են սեռական շարժառիթներով:
Նրա վերջին նախագիծը, որը ներկայացվել է Գագոսյան թանգարանում, վերստեղծել էր «Սուպերմենի» կոմիքսներից Կանդոր քաղաքը: Քելիի համար մտածելու և վերաիմաստավորելու սիրված թեմաները նորմայից հեռացումն էր, այլասերումը, փոփ-մշակույթը և համընդհանուր պարկեշտությունը:
