Грузия Online-ի փոխանցմամբ՝ Վրաստանի նախագահ Միխեիլ Սաակաշվիլին երեկ ուշ երեկոյան հանդիպել է ԱՄՆ պետքարտուղար Հիլարի Քլինթոնի հետ: Հանդիպումից հետո կազմակերպված համատեղ ճեպազրույցի ժամանակ Քլինթոնը Վրաստանն անվանել է «արժեքավոր գործընկեր»:
Քլինթոնը հավելել է. «Վրաստանի նկատմամբ ԱՄՆ-ի հետաքրքրությունն աճում է, ինչը գործընկերային հարաբերությունների լավ հետևանքն է: Վրաստանն ակտիվորեն մասնակցում է Աֆղանստանում տարվող գործողություններին, ուր վրացի զինծառայողներն աչքի են ընկնում բարձր արհեստավարժությամբ ու քաջությամբ:
Մենք շարունակում ենք ազատ առևտրի և ներդրումների շուրջ խորհրդակցություններ անցկացնել: Բացի այդ, կազմակերպվում են կոնֆերանսներ ու քննարկումներ, որոնցում քննարկվում են մշակութային, կրթական, առողջապահության, օրենքի գերակայության ոլորտներին առնչվող հարցեր:
Սաակաշվիլին իր ամերիկյան այցի շրջանակներում բազմաթիվ օգտակար հանդիպումներ է ունեցել, դրանք շարունակվում են, քանի որ Վրաստանի նկատմամբ ԱՄՆ-ի հետաքրքրությունը բարձր է»:
Սաակաշվիլին իր հերթին շնորհակալություն է հայտնել ԱՄՆ-ին՝ Վրաստանի տարածքային ամբողջականության ու ինքնիշխանության հարցում ցուցաբերած աջակցության համար, ինչն ապացուցվել է գործով:
Սաակաշվիլին նաև ողջունել է Քլինթոնի առաջիկա վրացական այցը: Քլինթոնը Բաթում կայցելի փետրվարին:
